തിരുവനന്തപുരം: ദേശീയപാതകളുടെ നവീകരണത്തിനും അ​റ്റകു​റ്റപ്പണിക്കുമായി കേന്ദ്രസർക്കാർ 457 കോടി രൂപ കൂടി അനുവദിച്ചതായി മന്ത്രി ജി. സുധാകരൻ നിയമസഭയിൽ പറഞ്ഞു. കേന്ദ്ര ഉപരിതല ഗതാഗത വകുപ്പ് മന്ത്രിയുമായി നടത്തിയ ചർച്ചകളുടെയും മുഖ്യമന്ത്രിയുടെ ഇടപെടലുകളുടെയും ഫലമായി 203.5 കോടി രൂപ നേരത്തേ അനുവദിച്ചിരുന്നു. ഇതോടെ 595 കിലോമീ​റ്റർ ദൈർഘ്യമുള്ള 60 പ്രവൃത്തികൾക്കായി 898 കോടി ലഭിച്ചെന്നും എം.സി. കമറുദീന്റെ സബ്മിഷനു മന്ത്രി മറുപടി നൽകി.
കേന്ദ്രസഹായം ഇങ്ങനെ: കൊല്ലത്തെ അമ്പലത്തുംകാല​ പുനലൂർ (40 കോടി), കടപ്പുഴ​കൊല്ലകടവ് (44 കോടി), ഹൈസ്​കൂൾ ജംഗ്ഷൻ​കടപ്പുഴ (34 കോടി), എറണാകുളം​ കക്കടാശേരി മ​റ്റക്കുഴി (45 കോടി), ഇടുക്കി അറുപത്തിയാറാം മൈൽ​ ഗവ. പോളിടെക്‌​നിക് വണ്ടിപ്പെരിയാർ (10 കോടി), ചാട്ടുപാറ​ ഇരുമ്പുപാലം (14 കോടി), അടിമാലി ​കുമളി (33 കോടി), ചെറുതോണി​പാലം (25 കോടി), മലപ്പുറം കു​റ്റിപ്പുറം​കാപ്പിരികാട് (47 കോടി), കുരിയാട് ​എടരിക്കോട് (13 കോടി), പാലക്കാട് ഒലവക്കോട് താണാവ് ചന്ദ്രനഗർ (13 കോടി), വയനാട് അടിവാരം​ചുണ്ടെൽ (33 കോടി), കണ്ണൂർ പരിയാരം​തൃച്ചമ്പരം (17 കോടി), കാസർകോട്​ പെർവാഡ് ചട്ടഞ്ചാൽ (36 കോടി) എന്നീ റീച്ചുകളുടെ നിർമ്മാണത്തിനും വിവിധ ജില്ലകളിലെ അറ്റകുറ്റപ്പണികൾക്കും പാലങ്ങളുടെ നവീകരണത്തിനുമായി 53 കോടിയുമാണ് അനുവദിച്ചതെന്ന് മന്ത്രി വ്യക്തമാക്കി.