തിരുവനന്തപുരം: കരമന കൂടത്തിൽ തറവാട്ടിലെ കൂട്ടമരണങ്ങൾ
അന്വേഷിക്കുന്ന പൊലീസ് സംഘം തറവാടിന്റെ ആസ്തിവകകൾ കണ്ട് ഞെട്ടിയിരിക്കുകയാണ്. തലസ്ഥാന നഗരത്തിലും സമീപപ്രദേശങ്ങളിലുമായി 18 ഏക്കർ സ്ഥലം ഈ കുടുംബത്തിനുണ്ടായിരുന്നെന്നാണ് കണ്ടെത്തൽ. 200 കോടിയിലേറെ വിലവരും ഈ ഭൂമിക്ക്. ഈ ഭൂമിയിൽ ഭൂരിഭാഗവും അന്യാധീനപ്പെട്ടു. മണക്കാട്, പാൽക്കുളങ്ങര വില്ലേജുകളിലുള്ള വസ്തുവകകളുടെ ഇപ്പോഴത്തെ അവകാശികളെ സംബന്ധിച്ച വിവരങ്ങൾ അന്വേഷണസംഘം ശേഖരിക്കുകയാണ്. സബ് രജിസ്ട്രാർ ഓഫീസുകളിൽ നിന്നും റവന്യു വകുപ്പിൽ നിന്നും ലഭിക്കുന്ന തെളിവുകൾ വിലയിരുത്തിയശേഷം വസ്തു ഇടപാടുമായി ബന്ധപ്പെട്ട രേഖകളുടെ ആധികാരികത അന്വേഷണ സംഘം ഉറപ്പിക്കും.
2012ൽ കൂടത്തിൽ തറവാട്ടിലെ ജയപ്രകാശിന്റെ മരണശേഷമാണ് അനന്തരാവകാശിയായ ജയമാധവൻ നായരുടെ സഹായത്തോടെ സ്വത്തുക്കൾ കാര്യസ്ഥന്റെ നേതൃത്വത്തിൽ പലർക്കായി ഭാഗിച്ചത്. കൂടത്തിൽ തറവാടുമായി ബന്ധമുള്ള എട്ടോളം പേർക്കും ജയമാധവനുമായിട്ടായിരുന്നു സ്വത്തുക്കൾ ഭാഗം ചെയ്തത്. സ്വത്ത് തട്ടിപ്പ് കേസിൽ പരാതിക്കാരിയായ പ്രസന്നകുമാരിയുടെ മകൻ പ്രകാശിനാണ് നിയമപരമായി കൂടത്തിൽ തറവാട്ടിലെ കോടികളുടെ സ്വത്തിന് അവകാശമുണ്ടായിരുന്നത്. എന്നാൽ, പ്രകാശ് സ്വത്ത് തട്ടിയെടുക്കാൻ ശ്രമം നടത്തുന്നതായി ആരോപിച്ച് ഇതിനിടെ കേസ് ഫയൽ ചെയ്തു. പിന്നീട് സ്വത്ത് സംബന്ധമായ തർക്കങ്ങൾ ഒത്തുതീർക്കുകയും ചെയ്തു. പ്രകാശിന് കൂടത്തിൽ തറവാടിനോട് ചേർന്നുള്ള 70 സെന്റ് സ്ഥലം നൽകി.
ജയമാധവൻ മരണപ്പെടും മുമ്പ് തയ്യാറാക്കിയതായി പറയപ്പെടുന്ന വിൽപത്രത്തിലൂടെയാണ് കാര്യസ്ഥൻ രവീന്ദ്രൻ നായർ കൂടത്തിൽ തറവാട്ടിലെ സ്വത്തുക്കളുടെ കൈവശക്കാരനായത്. ഈ സ്വത്തുക്കൾ പലതും വൻതുകയ്ക്ക് വിറ്റുവെന്ന വിവരവും അന്വേഷണ സംഘത്തിന് ലഭിച്ചിട്ടുണ്ട്.
അന്വേഷണസംഘം കണ്ടെത്തിയ
കൂടത്തിൽ തറവാടിന്റെ സ്വത്തുക്കൾ
കാലടി കുളത്തറയിലെ കൂടത്തിൽ കുടുംബവീടും അതിനോട് ചേർന്ന ഒരേക്കർ 90 സെന്റും
ചെറുപഴിഞ്ഞി ദേവീക്ഷേത്രത്തിന് സമീപത്തെ 1.5 ഏക്കർ തെങ്ങിൻ പുരയിടം
കാലടി താമരത്ത് 2.5 ഏക്കർ പുരയിടം
കാവാലി ജംഗ്ഷന് സമീപം 25 ഉം 75 ഉം സെന്റുകൾ
കാലടി ഇളംതെങ്ങ് ജംഗ്ഷന് സമീപം 80 സെന്റ് പുരയിടം
കാലടി തൈവിള റോഡിൽ 6 ഏക്കർ നിലം
കുളത്തറ പാലിയത്ത് 1.5 ഏക്കർ
കാലടി ഹോമിയോ ആശുപത്രിക്ക് സമീപം18 സെന്റ്
പാൽക്കുളങ്ങര ദേവീക്ഷേത്രത്തിന് സമീപം 30 സെന്റ്
ചെങ്കൽചൂള ഗവ. പ്രസിന് സമീപം കോടികൾ വിലമതിക്കുന്ന 50 സെന്റും വീടും
നേമം കാരയ്ക്കാമണ്ഡപത്തിന് സമീപം 2 ഏക്കർ തെങ്ങിൻ പുരയിടം