തിരുവനന്തപുരം: സംസ്ഥാന പൊലീസ് ആസ്ഥാനത്തെ എ.ഡി.ജി.പിയും സൈബർഡോം നോഡൽ ഓഫീസറുമായ മനോജ് എബ്രഹാമിന് രാജ്യാന്തര പുരസ്‌കാരം. രാജ്യാന്തര തലത്തിൽ കുട്ടികളുടെ നഗ്‌ന വീഡിയോകൾ പ്രചരിപ്പിക്കുന്നവർക്കെതിരെ സ്വീകരിച്ച നടപടികൾ കണക്കിലെടുത്താണ് പുരസ്‌കാരം (be a champion for child protection) ലഭിച്ചത്. ഫ്രാൻസിൽ നടന്ന ഇന്റർപോളിന്റെ രാജ്യാന്തര സമ്മേളനത്തിൽ ഇന്റർപോൾ സ്‌പെഷ്യലിസ്റ്റ് ഗ്രൂപ്പ് ചെയർ പോൾ ഗ്രിഫ്താസ് പുരസ്‌കാരം നൽകി.
ഇന്റർപോളിന്റെ നേതൃത്വത്തിൽ കുട്ടികൾക്കെതിരെയുളള കുറ്റകൃത്യങ്ങൾ തടയുക എന്ന വിഷയത്തിൽ ഫ്രാൻസിൽ നടക്കുന്ന രാജ്യാന്തര സമ്മേളനത്തിൽ മനോജ് എബ്രഹാം കുട്ടികളുടെ സംരക്ഷണത്തെപ്പറ്റി ക്ലാസും നയിച്ചു. കുട്ടികൾക്കെതിരെയുളള കുറ്റകൃത്യങ്ങൾ തടയുന്നതിൽ കേരള പൊലീസ് നടത്തിയ മികച്ച പ്രവർത്തനങ്ങളുടെ വിജയഗാഥയെക്കുറിച്ചാണ് അദ്ദേഹം ഫ്രാൻസിൽ പ്രബന്ധം അവതരിപ്പിച്ചത്.