തിരുവനന്തപുരം: കഴക്കൂട്ടത്ത് ടെക്നോപാർക്കിലും പരിസരത്തും സ്കൂട്ടറിൽ കറങ്ങി ടെക്കികളെ ശല്യപ്പെടുത്തുന്നത് പതിവാക്കിയ യുവാവിനെ തുമ്പ പൊലീസ് പൊക്കി. കഴക്കൂട്ടം ആറ്റിപ്ര സ്വദേശി അനീഷാണ് (23) പിടിയിലായത്. ഇന്ന് രാവിലെ 8 മണിയോടെ മൺവിളയിൽ നിന്നാണ് ഇയാളെ പൊലീസ് പിടികൂടിയത്. രാവിലെ 7.30 ഓടെ ടെക്നോ പാർക്കിലേക്ക് പോകുകയായിരുന്ന യുവതിയെ സ്കൂട്ടറിൽ പിന്തുടർന്ന ഇയാൾ കടന്നുപിടിച്ചു.

പെൺകുട്ടി ബഹളമുണ്ടാക്കിയതോടെ സ്കൂട്ടറിൽ രക്ഷപ്പെട്ട ഇയാൾ ടെക്നോപാർക്കിന്റെ പലഭാഗത്തായി സ്കൂട്ടറിൽ കറങ്ങി യുവതികളെ ശല്യപ്പെടുത്താറുണ്ട്. പലരും ഇക്കാര്യം പൊലീസ് സ്റ്റേഷനിൽ വിളിച്ചറിയിച്ചതിന് പിന്നാലെ അരമണിക്കൂറിനുശേഷം മൺവിളയിൽ വീണ്ടും ഒരു യുവതിയെ ശല്യപ്പെടുത്താൻ ശ്രമിച്ചപ്പോഴാണ് നാട്ടുകാരുടെ സഹായത്തോടെ യുവതി ഇയാളെ തടഞ്ഞുവച്ച് പൊലീസിന് കൈമാറിയത്. പൊലീസ് പിടിയിലായപ്പോൾ മാനസിക രോഗ ലക്ഷണങ്ങൾ പ്രകടിപ്പിക്കാൻ തുടങ്ങിയ ഇയാളെ പൊലീസ് നിരീക്ഷിച്ചുവരികയാണ്. വൈദ്യപരിശോധനയ്ക്ക് ശേഷം ഇയാളെ കോടതിയിൽ ഹാജരാക്കുമെന്ന് പൊലീസ് അറിയിച്ചു.