കിളിമാനൂർ: പഠനത്തോടൊപ്പം ജീവകാരുണ്യ പ്രവർത്തങ്ങൾ നടത്തി മാതൃകയാവുകയാണ് കിളിമാനൂർ ഗവ. എൽ.പി.എസിലെ കുരുന്നുകൾ. സ്കൂളിൽ പ്രവർത്തിക്കുന്ന ഗാന്ധി ദർശൻ ക്ലബിന്റെ നേതൃത്വത്തിലാണ് പ്രവർത്തനം. സമൂഹത്തിലെ നിർദ്ധന കുടുംബങ്ങൾക്കും കിടപ്പുരോഗികൾക്കും കൈത്താങ്ങായി മാറിക്കൊണ്ടിരിക്കുകയാണ് കുട്ടികൾ. ഗാന്ധി ദർശൻ ക്ലബിലെ കുരുന്നുകൾ നിർമ്മിച്ച ലോഷൻ വിദ്യാലയപരിസരത്തെ നിർദ്ധന കുടുംബങ്ങൾക്ക് സൗജന്യമായി എത്തിച്ചു കൊണ്ടാണ് പ്രവർത്തങ്ങൾക്ക് തുടക്കം കുറിച്ചത്. ജീവ കാരുണ്യപ്രവർത്തങ്ങളോടൊപ്പം സ്വദേശി ഉല്പന്നങ്ങളുടെ നിർമ്മാണവും ഉപയോഗവും പ്രോത്സാഹിപ്പിക്കുക, കുട്ടികൾക്ക് സ്വയം തൊഴിൽ ചെയ്യുന്നതിനുള്ള പ്രാപ്തി ലഭ്യമാക്കുക എന്നതാണ് പ്രവർത്തനത്തിന്റെ ലക്ഷ്യം. പദ്ധതിയുടെ ഭാഗമായി ആർ.ആർ.വി ബോയ്സ് വൊക്കേഷണൽ ഹയർ സെക്കൻഡറി സ്കൂളിലെ എൻ.എൻ.എസ് യൂണിറ്റാണ് കുട്ടികൾക്ക് പരിശീലനം നൽകിയത്. വാർഡ് മെമ്പർ ബീനാവേണുഗോപാൽ നേതൃത്വം നൽകിയ പരിപാടിയിൽ സ്‌കൂൾ പ്രധാന അദ്ധ്യപിക ടി.വി. ശാന്തകുമാരിയമ്മ, എൻ.എസ്.എസ് യൂണിറ്റ് കോഓർഡിനേറ്റർ ബി.എസ്. സുനിത, ഗാന്ധി ദർശൻ ക്ലബ്‌ കൺവീനർ നിസ, പി.ടി.എ പ്രസിഡന്റ്‌ ചേക്കു രാജീവ്‌ എന്നിവർ പങ്കെടുത്തു.