മുംബയ്: ഇന്നലെ ജാർഖണ്ഡിലായിരുന്ന അഭ്യന്തരമന്ത്രി അമിത്ഷാ ഡൽഹിയിൽ തിരിച്ചെത്തിയതോടെയാണ് മഹാരാഷ്ട്ര സർക്കാർ രൂപീകരണത്തിന്റെ ക്ളൈമാക്സ് സീൻ ആരംഭിച്ചത്. ഇന്ന് പുലർച്ചെ മൂന്ന് മണി വരെ അമിത് ഷായുടെ വസതിയിൽ സർക്കാർ രൂപീകരണവുമായി ബന്ധപ്പെട്ട് മാരത്തൺ ചർച്ചകളാണ് നടന്നത്. ബിജെപി-എൻ.സി.പി സഖ്യസർക്കാരിനുള്ള അടിത്തറയൊരുങ്ങിയത് അമിത് ഷായുടെ നേരിട്ടുള്ള ഈ ഇടപെടലിലൂടെയാണ്. ഇന്ന് പുലർച്ചെ നാല് മണി വരെ ടെലിഫോണിലൂടെ ദേവേന്ദ്ര ഫട്നാവിസ് ഫോണിലൂടെ അജിത് പവാറുമായി ചർച്ചകൾ നടത്തിയതായും വിവരം പുറത്തുവരുന്നുണ്ട്.

സർക്കാർ രൂപീകരിക്കാൻ അജിത്ത് പവാറും ബിജെപിയും തമ്മിൽ ധാരണയായതിന് പിന്നാലെ ഇന്ന് പുലർച്ചെ അ‍ഞ്ച് മണിയോടെ മഹാരാഷ്ട്രയിലെ രാഷ്ട്രപതി ഭരണം പിൻവലിച്ചു കൊണ്ടുള്ള ഉത്തരവുമായി കേന്ദ്ര അഭ്യന്തരസെക്രട്ടറി രാഷ്ട്രപതി ഭവനിലെത്തി. ആറ് മണിയോടെ രാഷ്ട്രപതി രാംനാഥ് കോവിന്ദ് ഈ ഉത്തരവിൽ ഒപ്പിട്ടു. തൊട്ടുപിന്നാലെ രാഷ്ട്രപതി ഭവൻ വിജ്ഞാപനം പുറപ്പെടുവിച്ചെങ്കിലും ഇതു രഹസ്യമാക്കി വച്ചു. ഇത്രയുമായപ്പോഴേക്കും മഹാരാഷ്ട്രയിൽ പുതിയ സർക്കാരിനുള്ള നീക്കങ്ങൾ ദ്രുതഗതിയിലായി. ദേവേന്ദ്ര ഫട്നാവിസും അജിത്ത് പവാറും രാജ്ഭവനിലെത്തി. പിന്നാലെ രണ്ട് പേരുടേയും സത്യപ്രതിജ്ഞ ചടങ്ങ് നടന്നു. ഞൊടിയിടയിൽ നടന്ന സത്യപ്രതിജ്ഞാ ചടങ്ങുകൾക്ക് ശേഷം മാത്രമാണ് സംസ്ഥാനത്ത് പുതിയ മുഖ്യമന്ത്രി വന്നുവെന്ന വിവരം പുറംലോകം അറിയുന്നത്.

പവാർ മോദിയെ കണ്ടതെന്തിനായിരുന്നു?