കിളിമാനൂർ :പരമ്പരാഗത ചിത്രകാരൻമാർക്കിടയിലെ യുക്തിവാദിയാണ് രാജാ രവിവർമ്മയെന്ന് മന്ത്രി എ.കെ.ബാലൻ. കേരള ലളിതകലാ അക്കാഡമിയുടെ സംസ്ഥാന ചിത്രശില്പകലാ പ്രദർശനവും പുരസ്കാര സമർപ്പണവും കിളിമാനൂർ രാജാ രവിവർമ്മ സാംസ്കാരിക നിലയത്തിൽ ഉദ്ഘാടനം ചെയ്യുകയായിരുന്നു അദ്ദേഹം.

ബി.സത്യൻ എം.എൽ. എ.അദ്ധ്യക്ഷത വഹിച്ച ചടങ്ങിൽ അടൂർ ഗോപാലകൃഷ്ണൻ മുഖ്യ അതിഥി ആയിരുന്നു. പുതു തലമുറയ്ക്ക് രവിവർമ്മയെയോ അദ്ദേഹത്തിന്റെ സംഭാവനകളോ അറിയില്ലെന്നും പാഠപുസ്തകങ്ങളിൽ രവിവർമ്മയെ കുറിച്ച് അറിവ് നൽകണമെന്നും അടൂർ പറഞ്ഞു. രവിവർമ്മ സാംസ്കാരിക നിലയത്തിൽ രവിവർമ്മ സ്മാരകം ഒരു കോടി രൂപ ചെലവിൽ നിർമ്മിക്കുന്ന കലാ ഗ്രാമത്തിന്റെ ശിലാസ്ഥാപനവും മന്ത്രി നിർവഹിച്ചു. എസ്.രാധാകൃഷ്ണൻ, കെ.കെ.മാരാർ എന്നിവരെ ഫെലോഷിപ്പ് നൽകി ആദരിച്ചു. അഹല്യ .എ.എസ്, ചിത്ര .ഇ.ജി, ജലജ .പി.എസ്, ജയേഷ് .കെ.കെ, വിനോദ് അമ്പലത്തറ എന്നിവർക്ക് സംസ്ഥാന ചിത്ര, ശില്പകല പുരസ്കാരങ്ങൾ നൽകി. ഓണറബിൾ മെൻഷൻ പുരസ്കാരം ടി.എസ്.പ്രസാദ്, രഞ്ചിത്ത് .ഐ.പി, സചിന്ദ്രൻ .കെ, സജീഷ് .പി.എ, സിബിന .എൻ.എം എന്നിവർക്കും വി.ശങ്കരമേനോൻ എൻഡോവ്മെന്റ് സ്വർണ മെഡൽ എസ്.അഭിരാഗിനും, വിജയരാഘവൻ എൻഡോവ്മെന്റ് സ്വർണ മെഡൽ എൻ.വി.ദ്രുവരാജിനും, കലാവിദ്യാർത്ഥികൾക്കുള്ള പുരസ്കാരം അശ്വതി .റ്റി.എസ്, ആതിര കെ.അനു, വിഷ്ണു .കെ.പി, ശ്രീലക്ഷ്മി .കെ.എസ്, സുധീഷ .വി എന്നിവർക്കും സമ്മാനിച്ചു. ചടങ്ങിൽ പഞ്ചായത്ത് വൈസ് പ്രസിഡന്റ് എ.ദേവദാസ്,സംഗീത നാടക അക്കാഡമി സെക്രട്ടറി എൻ.രാധാകൃഷ്ണൻ നായർ, വാസ്തുശില്പി ടി.എം.സിറിയക്, ബിജു രാമവർമ്മ, ലളിതകലാ അക്കാഡമി സെക്രട്ടറി പി.വി.ബാലൻ, അക്കാഡമി ചെയർമാൻ നേമം പുഷ്പരാജ് എന്നിവർ സംസാരിച്ചു.