തിരുവനന്തപുരം : ഇരുപത്തിനാലാമത് കേരള രാജ്യാന്തര ചലച്ചിത്രമേള ആറിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. നിശാഗന്ധിയിൽ വൈകിട്ട് ആറിന് നടക്കുന്ന ചടങ്ങിൽ മന്ത്രി എ.കെ. ബാലൻ അദ്ധ്യക്ഷനാകും. മന്ത്രി കടകംപള്ളി സുരേന്ദ്രൻ മുഖ്യാതിഥിയാകും. നടി ശാരദ വിശിഷ്ടാതിഥിയായിരിക്കും. ഫെസ്റ്റിവൽ ഹാൻഡ് ബുക്ക് ഡോ. ശശി തരൂർ എം.പി മേയർ കെ. ശ്രീകുമാറിന് നൽകി പ്രകാശനം ചെയ്യും. ഫെസ്റ്റിവൽ ബുള്ളറ്റിൻ വി.കെ. പ്രശാന്ത് എം.എൽ.എ ജില്ലാ പഞ്ചായത്ത് പ്രസിഡന്റ് വി.കെ. മധുവിന് നൽകി പ്രകാശിപ്പിക്കും. കെ.എസ്.എഫ്.ഡി.സി ചെയർമാൻ ഷാജി എൻ. കരുൺ, കെ.ടി.ഡി.സി ചെയർമാൻ എം. വിജയകുമാർ തുടങ്ങിയവർ പങ്കെടുക്കും.
പാസ്ഡ് ബൈ സെൻസർ ഉദ്ഘാടന ചിത്രം
ടർക്കിഷ് സംവിധായകനായ സെർഹത്ത് കരാസ്‌ലാന്റെ പാസ്ഡ് ബൈ സെൻസറാണ് ഉദ്ഘാടന ചിത്രം. കരാസ് ലാൻ സംവിധാനം ചെയ്‌ത ചിത്രത്തിന്റെ ഇന്ത്യയിലെ ആദ്യ പ്രദർശനം കൂടിയാണിത്. ജയിൽ പുള്ളികളുടെ കത്തുകൾ സെൻസർ ചെയ്യുന്ന ജയിൽജീവനക്കാരന്റെ ആത്മസംഘർഷങ്ങളാണ് ചിത്രത്തിന്റെ പ്രമേയം. ഗോൾഡൻ ഓറഞ്ച്, അങ്കാറ ഫിലിം ഫെസ്റ്റിവലുകളിൽ പ്രേക്ഷകപ്രീതി നേടിയ ചിത്രം യൂറോപ്യൻ ചലച്ചിത്ര നിരൂപക സംഘടനയുടെ മികച്ച ചിത്രത്തിനുള്ള പുരസ്‌കാരവും നേടിയിട്ടുണ്ട്.