ആലപ്പുഴ: കയർ കേരള 2019-നോടനുബന്ധിച്ച് ഡിസംബർ നാലു മുതൽ എട്ടുവരെ ഇ.എം.എസ് സ്റ്റേഡിയത്തിൽ വിവിധങ്ങളായ കലാപരിപാടികൾ അരങ്ങേറും.

4ന് വൈകിട്ട് 4.30ന് മന്ത്രി സി.രവീന്ദ്രനാഥ് സാംസ്‌കാരിക സന്ധ്യ ഉദ്ഘാടനം ചെയ്യും. മന്ത്രി തോമസ് ഐസക് അദ്ധ്യക്ഷത വഹിക്കും. മികച്ച നടിക്കുള്ള സംസ്ഥാന പുരസ്‌കാരം നേടിയ ചലച്ചിത്ര താരം നിമിഷ സജയൻ, എഴുത്തുകാരായ ഡോ. ഖദീജ മുംതാസ്, ഡോ. കെ.ശാരദക്കുട്ടി, ഡോ. പി.എസ്.ശ്രീകല എന്നിവർ മുഖ്യാതിഥികളാകും.

5.30ന് മട്ടന്നൂർ ശങ്കരൻകുട്ടിയുടെ നേതൃത്വത്തിൽ എട്ട് വാദ്യപ്രമാണിമാർ കേരളീയ തുകൽ വാദ്യങ്ങളുടെ വിസ്മയം തീർക്കും. തൃപ്പൂണിത്തുറ കൃഷ്ണദാസ് (ഇടയ്ക്ക), വെള്ളിനേഴി രാംകുമാർ (വലംതലച്ചെണ്ട), കലാമണ്ഡലം ഈശ്വരൻ (മിഴാവ്), പാഞ്ഞാൾ വേലുക്കുട്ടി (ഇലത്താളം), പല്ലാവൂർ കൃഷ്ണൻകുട്ടി (കുറുങ്കുഴൽ), മച്ചാട് മണികണ്ഠൻ (കൊമ്പ്), കോട്ടയ്ക്കൽ രവി (മദ്ദളം), ഒറ്റപ്പാലം ഹരി (തിമില) എന്നിവർ മട്ടന്നൂരിനൊപ്പം ചേരും. വാദ്യചരിത്രത്തിൽ ആദ്യമായാണ് ഇത്തരമൊരു സമന്വയം. വൈകിട്ട് 7.30ന് പിന്നണി ഗായകരായ മധു ബാലകൃഷ്ണൻ, സയനോര, രാജലക്ഷ്മി, അൻവർ സാദത്ത്, ആബിദ് എന്നിവർ നയിക്കുന്ന ഗാനമേള.

5ന് വൈകിട്ട് 6ന് എറണാകുളം യുവകലാ ചവിട്ടുനാടക സമിതി അവതരിപ്പിക്കുന്ന ചവിട്ടുനാടകം 'കാറൽസ്മാൻ ചരിതം'. 6.30ന് ചലച്ചിത്ര താരം സാനിയ ഇയ്യപ്പൻ, പാരിസ് ലക്ഷ്മി, നൂറിൻ, റംസാൻ മുഹമ്മദ് എന്നിവരുടെ നേതൃത്വത്തിൽ സജ്‌നാ നജാം സംവിധാനം ചെയ്ത ഡാൻസ് ഫ്യൂഷൻ ഫെസ്റ്റ്- 'രംഗോലി'.

ആറിന് വൈകിട്ട് അഞ്ചിന് രാജേഷ് ചേർത്തലയും സംഘവും അവതരിപ്പിക്കുന്ന വിൻഡ് ഫ്യൂഷൻ, ഏഴിന് ചലച്ചിത്ര പിന്നണി ഗായിക രശ്മി സതീഷ് നേതൃത്വം നൽകുന്ന രേസ ബാൻഡിന്റെ നാടൻപാട്ടുകൾ. എട്ടിന് കെ.പി.എ.സി യുടെ നാടകം 'മഹാകവി കാളിദാസൻ'.

7ന് വൈകിട്ട് 7ന് ഏകാംഗ നാടകം,രാത്രി 8.30ന് ചലച്ചിത്ര താരം റിമാ കല്ലിങ്കലിന്റെ നേതൃത്വത്തിൽ ഡാൻസ് ഫ്യൂഷൻ.

8ന് വൈകിട്ട് 6ന് ശ്രീജ ആറങ്ങോട്ടുകര അവതരിപ്പിക്കുന്ന നാട്ടുനാടകം. സൈക്കിൾ നാടകമെന്ന തിയേറ്റർ പരീക്ഷണവും അരങ്ങേറും. 7ന് സംഗീത വിസ്മയം

.