ആലപ്പുഴ:ദേശീയ പാത 66ൽ അരൂർ പളളിമുതൽ ചേർത്തല എക്സ്റെ ജംഗ്ഷൻ വരെയുള്ള പുനരുദ്ധാരണ പ്രവർത്തനങ്ങൾ പുരോഗമിക്കുന്നു. 23.665 കിലോമീ​റ്റർ നീളത്തിലെ പുനരുദ്ധാരണ പ്രവൃത്തികളാണ് ആധുനിക സാങ്കേതിക വിദ്യ പ്രയോജനപ്പെടുത്തിയുള്ള നിർമ്മാണത്തിലൂടെ ശ്രദ്ധപിടിച്ചുപ​റ്റുന്നത്.

കോൾഡ് മില്ലിംഗ് ആൻഡ് റീ സൈക്ലിംഗ് ഇൻ ഹോട്ട് മിക്സ് പ്ലാന്റ് രീതിയിലാണ് റോഡ് പുനർനിർമ്മാണം. ജർമൻ നിർമ്മിത യന്ത്റങ്ങളാണ് ഉപയോഗിക്കുന്നത്. 36.07 കോടി രൂപയാണ് ഈ പ്രവൃത്തിയുടെ അടങ്കൽ തുക. നിലവിലുള്ള ദേശീയ പാതയുടെ ഉപരിതലം അത്യാധുനിക മെഷീൻ ഉപയോഗിച്ച് അടർത്തിയെടുത്ത് അതിന്റെ 30 ശതമാനം പുതിയ റോഡ് നിർമാണ സാമഗ്രികളുമായി ചേർത്ത് വീണ്ടും നിർമ്മാണത്തിനുപയോഗിക്കും. തുടർന്ന് അഞ്ച് സെന്റീമീ​റ്റർ കനത്തിൽ ബി​റ്റുമിനസ് മെക്കാഡവും അതിന് മുകളിൽ ബി​റ്റുമിനസ് കോൺക്രീറ്റും ഇട്ട് ഉപരിതലം ഉറപ്പിക്കും. ഇത്തരത്തിൽ നിർമിക്കുന്ന റോഡിന് ഉറപ്പുകൂടുതലാണ്. പരിസ്ഥിതി സൗഹൃദവുമാണ്.

റോഡ് അടർത്തിമാ​റ്റിയെടുക്കുന്ന മെ​റ്റലിലെ ശേഷിക്കുന്ന 70 ശതമാനം റോഡിന്റെ ഇരുവശങ്ങളിലും നിരത്തും.