ഭോപ്പാൽ: പശുക്കൾക്ക് 'അനുയോജ്യരായ വരൻമാരെ " കണ്ടെത്താൻ കാളകളുടെ ‘സമ്പൂർണ ജാതകം’ വെബ്സൈറ്റിലിട്ട് മദ്ധ്യ​പ്രദേശ്​ മൃഗസംരക്ഷണ വകുപ്പ്​. സ്വന്തം പശുക്കൾക്ക് മികച്ച കാളകളുടെ ബീജം കിട്ടാൻ ക്ഷീര കർഷകരെ സഹായിക്കാനാണിത്.

16 ഇനങ്ങളിൽപ്പെട്ട 200ലധികം കാളകളുടെ വിവരങ്ങൾ​ ഭോപാലിലെ സെൻട്രൽ സെമൻ സ്റ്റേഷന്റെ 'www.cssbhopal.com" എന്ന വെബ്​സൈറ്റിലുണ്ട്​​. കാളകളുടെ വയസും ഇനവും വംശ പാരമ്പര്യവുമൊക്കെ വിശദീകരിക്കുന്നതിനൊപ്പം സുന്ദരന്മാരുടെ ഫോട്ടോയും വീഡിയോയും ഇട്ടിട്ടുണ്ട്. ആവശ്യക്കാർ നല്ലവണ്ണം ബോദ്ധ്യപ്പെട്ട് വരനെ തിരഞ്ഞെടുത്താൽ മതി.

‘ ജേഴ്​സി, എച്ച്​.എഫ്​ ഉൾപ്പെടെ 16 ഇനം കാളകളുടെ ബീജം ശേഖരിച്ച് ഗുണമേന്മ നിശ്ചയിച്ച്​, ശീതീകരിച്ച്​ സൂക്ഷിച്ചിരിക്കുകയാണ്​. ഇവയുടെ ജാതകം സ്വന്തം പശുക്കൾക്ക് യോജിക്കുന്നതാണെന്ന് വായിച്ചുറപ്പിച്ച ശേഷം കർഷകർക്ക് ബീജം വാങ്ങാം’- ഭോപാൽ സി.എസ്.എസ്​ മാനേജർ ഡോ. ദീപാലി ദേശ്​പാണ്​ഡെ പറഞ്ഞു.