ആലപ്പുഴ: കള്ള് വ്യവസായ തൊഴിലാളി ക്ഷേമനിധി ബോർഡിന്റെ ട്രഷറി നിക്ഷേപം പണയംവെച്ച് 500 കോടി​ രൂപ സമാഹരി​ക്കാനുള്ള സർക്കാർ നീക്കം പാളി. 21 അംഗ ബോർഡിൽ ഭൂരിപക്ഷം പേരും സർക്കാർ നീക്കത്തെ എതിർത്തു.

ക്ഷേമനി​ധി​ ബോർഡി​ന്റെ പക്കൽ 2237 കോടി രൂപ നീക്കിയിരിപ്പുണ്ട്. ഇതിൽ 2000 കോടിയോളം ട്രഷറിയിൽ സ്ഥിരനിക്ഷേപമാണ്. നി​ക്ഷേപരേഖകൾ പണയം വച്ച് 500 കോടി​യാണ് സർക്കാർ കഴി​ഞ്ഞ മാസം ആവശ്യപ്പെട്ടത്. അര ശതമാനം പലി​ശ കൂടുതൽ നൽകാമെന്നായി​രുന്നു വാഗ്ദാനം. ബോർഡ് പല ദേശസാൽകൃത ബാങ്കുകളെയും സമീപി​ച്ചെങ്കി​ലും കാനറ ബാങ്ക് മാത്രമാണ് സന്നദ്ധത പ്രകടി​പ്പി​ച്ചത്. പക്ഷേ അതി​നായി​ അവർ പ്രോജക്ട് റി​പ്പോർട്ടും 500 കോടി​ക്ക് 550 കോടിയുടെ നി​ക്ഷേപരേഖയും ആവശ്യപ്പെട്ടു. വായ്പയെടുത്ത് കൂടുതൽ പലി​ശയ്ക്ക് കടം കൊടുക്കുന്ന പദ്ധതി​ ബാങ്കി​ന് സ്വീകാര്യമായി​രുന്നി​ല്ല. കൂടാതെ ബോർഡി​ന്റെ ആഡി​റ്റർമാരും വക്കീലും ഇതി​നെ പി​ന്തുണച്ചി​ല്ല. ഇരുകൂട്ടരെയും ഇന്നലെ ചേർന്ന ബോർഡ് യോഗത്തി​ലേക്കും വി​ളി​ച്ചിരുന്നു. നി​ക്ഷേപം ക്ഷേമപ്രവർത്തനത്തി​നല്ലാതെ പണയംവയ്ക്കുന്നത് ചട്ടവി​രുദ്ധമെന്നായി​രുന്നു ഇവരുടെ ഉപദേശം.

ക്ഷേമനി​ധി​ ബോർഡി​ന് ആദായനി​കുതി​ വകുപ്പി​ന്റെ ഇളവുകൾ ലഭി​ക്കാറുണ്ട്. നടപ്പുവർഷവും 15 കോടി​ ഇങ്ങിനെ തി​രി​കെ ലഭി​ച്ചി​ട്ടുണ്ട്. സർക്കാരി​ന് വായ്പ കൊടുക്കാൻ പോയാൽ ഈ ഇളവുകൾ ലഭി​ക്കി​ല്ലെന്ന ഉപദേശവും ആഡി​റ്റർമാർ നൽകി​യെന്നാണ് സൂചന. ബോർഡ് ചെയർമാൻ എം.സുരേന്ദ്രൻ യോഗത്തി​ൽ അദ്ധ്യക്ഷത വഹി​ച്ചു.