തൊടുപുഴ: പട്ടാപ്പകൽ നഗരത്തിൽ യുവതിയെ കടന്ന് പിടിച്ച് അശ്ലീലം പറഞ്ഞ യുവാവിനെ പൊലീസ് പിടികൂടി. പുറപ്പുഴ സ്വദേശി സുനിലാണ് (37) അറസ്റ്റിലായത്. ശനിയാഴ്ച രാവിലെ 10ന് പാലാ റൂട്ടിലായിരുന്നു സംഭവം. സ്‌കൂട്ടറിലെത്തിയ പ്രതി നടന്നു വരികയായിരുന്ന യുവതിയെ ആദ്യം പിന്തുടർന്നു. അതിന് ശേഷം സ്‌കൂട്ടർ നിറുത്തി യുവതിയുടെ സമീത്തേക്ക് എത്തിയ ഇയാൾ കൈയിൽ കടന്നു പിടിക്കുകയും അശ്ലീലച്ചുവയോടെ സംസാരിക്കുകയുമായിരുന്നു. കുതറിമാറിയ യുവതി ഇയാളുടെ ചിത്രം മൊബൈൽ ക്യാമറയിൽ പകർത്തി പൊലീസ് സ്റ്റേഷനിലെത്തിക്കുകയായിരുന്നു. തൊടുപുഴ എസ്.ഐ എം.പി. സാഗറിന്റെ നേതൃത്വത്തിൽ നടത്തിയ അന്വേഷണത്തിൽ ചുങ്കം ഭാഗത്ത് നിന്ന് പ്രതിയെ പിടികൂടി. ഇയാളെ കോടതിയിൽ ഹാജരാക്കി.