കാസർകോട്: പട്ടിക ജാതി വിഭാഗത്തിൽപ്പെട്ട 14കാരിയെ സ്‌കൂൾ വരാന്തയിൽ പീഡിപ്പിച്ച കേസിലെ പ്രതി കുറ്റക്കാരനാണെന്ന് കോടതി കണ്ടെത്തി. മംഗൽപാടി കുബന്നൂരിലെ യശ്വന്ത് എന്ന അപ്പുവിനെ (35) യാണ് ജില്ലാ അഡീഷണൽ സെഷൻസ് (ഒന്ന്) കോടതി ഇന്നലെ കുറ്റക്കാരനാണെന്ന് കണ്ടെത്തിയത്.

പ്രതിക്കുള്ള ശിക്ഷ ഇന്നു പ്രഖ്യാപിക്കും. മംഗൽപാടി പഞ്ചായത്ത് പരിധിയിൽ താമസിക്കുന്ന പെൺകുട്ടിയുടെ പരാതിയിലാണ് യശ്വന്തിനെതിരെ പൊലീസ് പോക്‌സോ നിയമപ്രകാരം കേസെടുത്തത്. 2014 ഡിസംബർ, ജനുവരി മാസങ്ങളിൽ യശ്വന്ത് പെൺകുട്ടിയെ പ്രലോഭിപ്പിച്ച് രാത്രി സ്‌കൂൾ വരാന്തയിലേക്ക് കൂട്ടികൊണ്ടുപോയി പീഡിപ്പിച്ചുവെന്നാണ് കേസ്. കാസർകോട് സ്‌പെഷൽ മൊബൈൽ സ്‌ക്വാഡാണ് ഈ കേസിൽ അന്വേഷണം നടത്തി പ്രതിയെ അറസ്റ്റു ചെയ്തത്‌.