കോഴിക്കോട്: മുന്നൊരുക്കങ്ങളോ ബദൽ സംവിധാനമോ ഇല്ലാതെ നടപ്പാക്കുന്ന പ്ലാസ്റ്റിക് നിരോധനത്തിൽ പ്രതിഷേധിച്ച് സംസ്ഥാനവ്യാപകമായുള്ള പ്രക്ഷോഭത്തിന്റെ ഭാഗമായി കേരള വ്യാപാരി വ്യവസായി ഏകോപനസമിതി യൂത്ത് വിംഗിന്റെ നേതൃത്വത്തിൽ കളക്ടറേറ്റിലേക്ക് മാർച്ച് നടത്തി.

ഏകോപന സമിതി സംസ്ഥാന പ്രസിഡന്റ് ടി.നസിറുദ്ദീൻ ധർണാസമരം ഉദ്ഘാടനം​ ചെയ്തു.​ പ്ലാസ്റ്റിക് വസ്തുക്കളുടെ ഉത്പാദനം ഘട്ടംഘട്ടമായി കുറച്ചുകൊണ്ടുവരുന്നതിന് പകരം ഒറ്റയടിക്ക് നിരോധനം അടിച്ചേല്പിക്കുന്നത് പ്രായോഗികമ​ല്ലെന്ന് അദ്ദേഹം പറഞ്ഞു. ഉത്പാദകനും ഉപഭോക്താവിനും പിഴയില്ലാതെ വ്യാപാരികൾക്ക് മാത്രം പിഴയെന്ന നിർ​ദ്ദേ​ശം കച്ചവടക്കാരെ ദ്രോഹിക്കാനെ ഉപകരിക്കൂ​.

യൂത്ത് വിംഗ് സംസ്ഥാന ജനറൽ സെക്രട്ടറിയും ജില്ലാ പ്രസിഡന്റുമായ മനാഫ് കാപ്പാട് അദ്ധ്യക്ഷത വഹിച്ചു. സലീം രാമനാട്ടുകര,​ കെ.സേതുമാധവൻ,​ മുർതസ് താമരശ്ശേരി, ജലീൽ വടകര, സാജിദ് പേരാമ്പ്ര, ഗിരീഷ് ബാലുശ്ശേരി, റാഷിദ് തങ്ങൾ, ജലീൽ അത്തോളി, സിദീഖ് പൂവാട്ട്പറമ്പ്, റിയാസ് ഓർക്കാട്ടേരി, സന്തോഷ് സെബാസ്‌റ്റ്യൻ കോടഞ്ചേരി, റിയാസ് മുക്കം, സുനൈദ് പയ്യോളി​ എന്നിവർ സംസാരിച്ചു.​

എരഞ്ഞിപാലം ജംഗ്ഷനിൽ നിന്നായിരുന്നു മാർച്ചിന്റെ തുടക്കം.