കോഴിക്കോട്: ബനാറസ് യൂനിവേഴ്‌സിറ്റിയിലെ അന്തർദേശീയ നൃത്തോത്സവത്തിൽ ബാല നർത്തകി നിളാനാഥിന് പുരസ്‌കാരം. ബനാറസ് യൂനിവേഴ്‌സിറ്റി പെർഫോമിങ് ആർട്‌സും കൃഷ്ണപ്രിയ കഥക് കേന്ദ്രയും നടത്തിയ ജൂനിയർ വിഭാഗം മത്സരത്തിലാണ് മോഹിനിയാട്ടം അവതരിപ്പിച്ച് നിളാ നാഥ് ഉജ്വൽ കലാ സാധക് സമ്മാൻ പുരസ്‌കാരം നേടിയത്. പല്ലവി കൃഷ്ണയുടെ കീഴിൽ ദീർഘകാലമായി നൃത്തം പരിശീലിക്കുന്ന നിളാ നാഥ് കലാമണ്ഡലം സത്യവ്രതൻ ചിട്ടപ്പെട്ടുത്തിയ മണ്ഡോദരി വിലാപമാണ് വേദിയിലവതരിപ്പിച്ചത്. ഡെറാഡൂണിൽ നടന്ന മോഹിനിയാട്ട മത്സരത്തിൽ രാജ്യത്തെ മികച്ച നർത്തകിയായും കക്കോടി സ്വദേശിനിയായ നിളനാഥിനെ തിരഞ്ഞെടുത്തിരുന്നു. ചേളന്നൂർ എ.കെ.കെ.ആർ ഗേൾസ് ഹയർ സെക്കൻഡറി സ്‌കൂൾ വിദ്യാർഥിനിയാണ്. മാദ്ധ്യമ പ്രവർത്തകനായ എ.ബിജു നാഥിന്റെയും പരേതയായ ഷീബയുടെയും മകളാണ്. അനേഷ് ബദരീനാഥാണ് സഹോദരൻ.