കൽപ്പറ്റ: മൂന്ന് നിയമസഭാ മണ്ഡലങ്ങളിലെയും വോട്ടർ പട്ടിക പുതുക്കുന്നതുമായി ബന്ധപ്പെട്ട പ്രവർത്തനങ്ങൾ ജില്ലയിലെ വോട്ടർ പട്ടികാ നിരീക്ഷകനായ തുറമുഖ വകുപ്പ് സെക്രട്ടറി സഞ്ജയ് കൗൾ വിലയിരുത്തി. വോട്ടർ പട്ടികയിൽ പേര് ചേർക്കുന്നതിനും തിരുത്തലുകൾക്കും പൊതുജനങ്ങൾക്കിടയിൽ ആവശ്യമായ പ്രചരണം നടത്താൻ രാഷ്ട്രീയ പാർട്ടികളുടെ സഹകരണം ആവശ്യമാണെന്ന് സഞ്ജയ് കൗൾ അഭിപ്രായപ്പെട്ടു.

എല്ലാ ബൂത്തുകളിലും ബി.എൽ.എമാരെ നിയമിക്കണമെന്ന് രാഷ്ട്രീയ പാർട്ടി പ്രതിനിധികളോട് അദ്ദേഹം അഭ്യർത്ഥിച്ചു.

അന്തിമ വോട്ടർ പട്ടിക ഫെബ്രുവരി 7 ന് പ്രസിദ്ധീകരിക്കും. പുതുതായി വോട്ടർ പട്ടികയിൽ പേര് ചേർക്കുന്നവർ അപേക്ഷയോടൊപ്പം മൊബൈൽ ഫോൺ നമ്പറും അടുത്ത ബന്ധുക്കളുടെ തിരിച്ചറിയൽ കാർഡ് കോപ്പിയും നൽകണം. പേര് ചേർക്കുന്നതിനും നീക്കം ചെയ്യുന്നതിനും തിരുത്തൽ വരുത്തുന്നതിനും ജനുവരി 15 വരെ സമയം ലഭിക്കും. 27 നകം അപേക്ഷകളിൽ തീർപ്പ് കൽപ്പിക്കും. പട്ടികയുമായി ബന്ധപ്പെട്ട ആക്ഷേപങ്ങൾ smksecy@gmail എന്ന വിലാസത്തിലോ 0471 2517011 , 2333701, 9447011901 എന്ന ഫോൺ നമ്പറിലോ അറിയിക്കാം.

മാനന്തവാടി താലൂക്ക് ഓഫീസിൽ നടന്ന യോഗത്തിൽ ഇലക്ഷൻ ഡെപ്യൂട്ടി കളക്ടർ കെ.ജയപ്രകാശ്, ഇ.ആർ.ഒമാർ,വില്ലേജ് ഓഫീസർമാർ,ഇലക്ഷൻ ഉദ്യോഗസ്ഥർ തുടങ്ങിയവർ പങ്കെടുത്തു.