കൽപ്പറ്റ: സ്ത്രീകൾക്കു നേരെ വർദ്ധിച്ച് വരുന്ന അതിക്രമങ്ങൾക്കെതിരെ ശക്തമായ പൊതുബോധം ഉണർത്തുന്നതിനും നിലവിലുള്ള പ്രതിരോധ സംവിധാനങ്ങൾ ശക്തിപ്പെടുത്തുന്നതിനും സ്ത്രീകൾക്ക് അന്യമാകുന്ന പൊതുയിടങ്ങൾ തിരിച്ചുപിടിക്കുന്നതിനുമായി 'പൊതു ഇടം എന്റേതും" എന്ന പേരിൽ നൈറ്റ് വാക്ക് നടത്തുന്നു.

വനിത ശിശു വികസന വകുപ്പിന്റെ നേതൃത്വത്തിൽ നിർഭയ ദിനമായ ഞായറാഴ്ച കൽപ്പറ്റ, മാനന്തവാടി, സുൽത്താൻ ബത്തേരി എന്നീ നഗരസഭകൾ കേന്ദ്രീകരിച്ച് ഒമ്പത് ഇടങ്ങളിലാണ് നൈറ്റ് വാക്ക് നടത്തുന്നത്. സർക്കാരിന്റെ 'സധൈര്യം മുന്നോട്ട്" പരിപാടിയുടെ ഭാഗമായി സ്ത്രീ സുരക്ഷാ നടപടികൾ ശക്തമാക്കുന്നതിന്റെ ഭാഗമായാണ് ഇന്ന് (ഡിസംബർ 29) രാത്രി 11 മണി മുതൽ തിങ്കളാഴ്ച പുലർച്ചെ 1 മണി വരെ നൈറ്റ് വാക്ക് സംഘടിപ്പിക്കുന്നത്.
കൽപ്പറ്റ ജംഗ്ഷൻ മുതൽ ബൈപ്പാസ് വഴി കൈനാട്ടി, പിണങ്ങോട് റോഡ്, മാനന്തവാടി തലശ്ശേരി റോഡ്, മൈസൂർ റോഡ്, താഴെയങ്ങാടി റോഡ്, വള്ളിയൂർക്കാവ് റോഡ്, കോഴിക്കോട് റോഡ്, സുൽത്താൻ ബത്തേരി ജംഗ്ഷൻ മൈസൂർ റോഡ്, ചീരാൽ റോഡ് എന്നിവിടങ്ങളിലാണ് നൈറ്റ് വാക്കിന് തെരഞ്ഞെടുത്ത കേന്ദ്രങ്ങൾ.

ശ്രദ്ധിക്കാൻ

ഒറ്റയ്‌ക്കോ രണ്ടോ മൂന്നോ സംഘങ്ങളായി വേണം നൈറ്റ് വാക്കിൽ പങ്കെടുക്കേണ്ടത്.
ഒറ്റയ്ക്ക് പോകുന്നവരുടെയും ചെറു സംഘങ്ങളുടെയും പക്കൽ അടിയന്തിര സാഹചര്യത്തിന് ഉപയോഗിക്കുന്നതിനായി ഓരോ വിസിൽ കരുതേണ്ടതാണ്.
അതിക്രമങ്ങൾ നേരിടേണ്ടി വരുന്നവർ മോശമായി പെരുമാറുന്ന ആളുടെ ഫോട്ടോ എടുത്ത് പൊലീസിന് കൈമാറി കേസ് രജിസ്റ്റർ ചെയ്‌തെന്ന് ഉറപ്പ് വരുത്തണം.