കോട്ടയം: മുംബെയിലെ സ്വകാര്യ ലോഡ്ജിൽ രണ്ടുവയസുകാരിയെ കൊലപ്പെടുത്തിയ ശേഷം വിഷം കഴിച്ച് ആത്മഹത്യക്ക് ശ്രമിച്ച് ചികിത്സയിലായിരുന്ന ശാന്തമ്പാറ റിജോഷ് വധക്കേസിലെ പ്രതി വസിം അറസ്റ്റിൽ. മുംബെയ് പൊലീസ് കോടതിയിൽ ഹാജരാക്കിയ വാസിമിനെ പൻവേൽ പൊലീസ് കസ്റ്റഡിയിൽ വാങ്ങി ചോദ്യം ചെയ്ത് വരികയാണ്.

കുട്ടിയെ കൊലപ്പെടുത്തിയതിന് അറസ്റ്റിലായ വസിമിനെ ഇന്നോ നാളെയോ കൊലനടന്ന പൻവേൽ സമീർ ഹോട്ടലിൽ എത്തിച്ച് തെളിവെടുപ്പ് നടത്തും. വാസീമിനൊപ്പം ആശുപത്രിയിൽ കഴിഞ്ഞിരുന്ന റിജോഷിന്റെ ഭാര്യ ലിജിയെ കഴിഞ്ഞ ആഴ്ച പൻവേൽ മജിസ്ട്രേറ്റ് കോടതി 14 ദിവസത്തേയ്ക്ക് റിമാൻഡ് ചെയ്തിരുന്നു.
ധർഷാദ്ബാദ് ജയിലിൽ കഴിയുന്ന ലിജിയെ നെടുങ്കണ്ടം കോടതിയിൽ ഹാജരാക്കുന്നതിന് പ്രൊഡക്ഷൻ വാറണ്ട് നൽകിയിട്ടുണ്ട്. കോടതിയിൽ ഹാജരാക്കുന്ന വസിമിനു വേണ്ടിയും അടുത്തയാഴ്ച പ്രൊഡക്ഷൻ വാറണ്ട് നൽകും.