കോട്ടയം: ഉന്നതവിദ്യാഭ്യാസ സ്ഥാപനങ്ങളിലെ മാനവികവിഷയങ്ങളിലെ ഗവേഷണവും കണ്ടുപിടിത്തങ്ങളും ശക്തിപ്പെടുത്തുന്നതിനായി യു.ജി.സി. നടപ്പാക്കിയ സ്‌കീം ഫോർ ട്രാൻസ് ഡിസിപ്ലിനറി റിസർച്ച് ഫോർ ഇന്ത്യാസ് ഡെവലപിംഗ് ഇക്കണോമി (സ്‌ട്രൈഡ്) പദ്ധതിയിലേക്ക് മഹാത്മാഗാന്ധി സർവകലാശാല തെരഞ്ഞെടുക്കപ്പെട്ടതായി വൈസ് ചാൻസലർ പ്രൊഫ. സാബു തോമസ് പറഞ്ഞു. തെരഞ്ഞെടുക്കപ്പെട്ട രാജ്യത്തെ 16 സർവകലാശാലകളിൽ കേരളത്തിൽനിന്ന് കാലടി ശ്രീശങ്കരാചാര്യ സംസ്‌കൃത സർവകലാശാലയും ഉൾപ്പെടും. മൂന്നുവർഷത്തെ പ്രവർത്തനങ്ങൾക്കായി ഒരു കോടി രൂപ വരെ ലഭിക്കും.

സർവകലാശാല പഠനവകുപ്പുകളിലെയും അഫിലിയേറ്റഡ് കോളേജുകളിലെയും അദ്ധ്യാപകരുടെ കാര്യക്ഷമത വർദ്ധിപ്പിക്കുന്നതിനവേണ്ടി എം.ജി. സമർപ്പിച്ച പദ്ധതിയാണ് യു.ജി.സി. അംഗീകരിച്ചത്. നൂതന അദ്ധ്യാപന രീതികൾ പരിചയപ്പെടുത്തുക, പാഠ്യപദ്ധതി പ്രോജക്ട് പ്രൊപ്പോസലുകൾ തയാറാക്കലിൽ വൈദഗ്ധ്യം സൃഷ്ടിക്കുക, അക്കാദമിക എഴുത്തുരീതികളിൽ വൈദഗ്ധ്യം നൽകുക, അദ്ധ്യാപനത്തിൽ നൂതന സാങ്കേതികവിദ്യകളുടെ പ്രയോഗം പരിചയപ്പെടുത്തുക എന്നിവയടക്കം അദ്ധ്യാപകരുടെ കാര്യക്ഷമത വർദ്ധിപ്പിക്കുകയാണ് ഇതിലൂടെ ലക്ഷ്യമിടുന്നത്. ഇതിനായി സെമിനാറുകൾ, ശില്പശാലകൾ, സമ്മേളനങ്ങൾ, സിമ്പോസിയങ്ങൾ എന്നിവ സംഘടിപ്പിക്കും. വിദേശ സർവകലാശാലകളുമായി സഹകരിച്ച് അദ്ധ്യാപക കൈമാറ്റ പരിപാടിയും ലോകത്തിലെ പ്രശസ്ത ശാസ്ത്രജ്ഞരായ അദ്ധ്യാപകരുടെ പ്രഭാഷണ പരിപാടികളും ഇതിന്റെ ഭാഗമായി സംഘടിപ്പിക്കുമെന്ന് പദ്ധതിയുടെ കോ ഓർഡിനേറ്ററായ സ്‌കൂൾ ഒഫ് സോഷ്യൽ സയൻസസിലെ അദ്ധ്യാപകൻ ഡോ. അഭിലാഷ് ബാബു പറഞ്ഞു.