വൈക്കം: ഹരിത കേരളം മിഷന്റെ ഇനി ഞാനൊഴുകട്ടെ പദ്ധതിയുടെ ഭാഗമായി ചെമ്പ് ഗ്രാമപഞ്ചായത്തിലെ പുല്ലാന്തിയാർ ശുചീകരണത്തിന് തുടക്കമായി. കല്ലുകുത്താംകടവ് പാലത്തിനു സമീപം സി.കെ.ആശ എം.എൽ.എ ശുചീകരണം ഉദ്ഘാടനം ചെയ്തു. പുളിക്കൽ മുതൽ വൈപ്പാടം വരെ രണ്ടു കിലോമീറ്ററാണ് വൃത്തിയാക്കുന്നത്. പഞ്ചായത്തിലെ മൂന്ന്, നാല്, അഞ്ച്, എട്ട്, ഒൻപത്, 10 വാർഡുകളിലൂടെ ഒഴുകി മൂവാറ്റുപുഴയാറിൽ ചേരുന്ന പുല്ലാന്തിയാറിന്റെ തീരങ്ങൾ ചെളിയും മാലിന്യങ്ങളും നിറഞ്ഞ നിലയിലായിരുന്നു. തീരങ്ങൾ വൃത്തിയാക്കുന്നതിനു പുറമേ യന്ത്ര സഹായത്തോടെ ചെളി കോരി മാറ്റി നീരൊഴുക്ക് സുഗമമാക്കുന്നതിനുള്ള പ്രവർത്തനങ്ങൾ ചെയ്തു വരികയാണ്. തൊഴിലുറപ്പ് തൊഴിലാളികൾ, സന്നദ്ധ സംഘടനകൾ, യുവജനങ്ങൾ, സാംസ്‌കാരിക പ്രവർത്തകർ തുടങ്ങിയവർ ശുചീകരണത്തിൽ പങ്കാളികളായി. ചടങ്ങിൽ വൈക്കം ബ്ലോക്ക് പഞ്ചായത്ത് പ്രസിഡന്റ് എം.വൈ. ജയകുമാരി അദ്ധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്റ് ലതാ അശോകൻ, വൈസ് പ്രസിഡന്റ് എം. കെ. സനിൽ കുമാർ, സ്ഥിരം സമിതി അദ്ധ്യക്ഷരായ അഡ്വ. ജി. ഷീബ, എം.എസ് പ്രേമദാസൻ, സീനാ ബിജു, ബ്ലോക്ക് പഞ്ചായത്തംഗങ്ങളായ വി.കെ. രാജു, സന്ധ്യമോൾ സുനിൽ, ഗ്രാമപഞ്ചായത്തംഗങ്ങൾ തുടങ്ങിയവർ പങ്കെടുത്തു.