പൂഞ്ഞാർ: ഗ്രാമപഞ്ചായത്തിലെ മൂന്നു സ്‌കൂളുകളിൽ ശുചിത്വമിഷന്റെ സഹകരണത്തോടെ തുമ്പൂർമൂഴി മോഡൽ മാലിന്യസംസ്‌ക്കരണ പ്ലാന്റുകൾ സ്ഥാപിച്ചു.

എസ്.എം.വി ഹയർ സെക്കൻഡറി സ്‌കൂൾ, മണിയംകുന്ന് സെന്റ് ജോസഫ്‌സ് യു.പി.എസ്, ചേന്നാട് സെന്റ് മരിയ ഹൈസ്‌കൂൾ എന്നിവിടങ്ങളിലാണ് ഗ്രാമപഞ്ചായത്തിന്റെ കഴിഞ്ഞ വാർഷിക പദ്ധതിയിൽ ഉൾപ്പെടുത്തി പ്ലാന്റ് നിർമിച്ചത്. ഓരോ സ്‌കൂളിനും 2.40 ലക്ഷം രൂപ വീതം ആകെ 7.20 ലക്ഷം രൂപ ചെലവഴിച്ചു. കരിയിലയും ജൈവ മാലിന്യങ്ങളും പ്രത്യേക അനുപാതത്തിൽ നിക്ഷേപിച്ചാണ് പ്ലാന്റിൽ മാലിന്യം ജൈവവളമാക്കി മാറ്റുന്നത്. ഹരിത കർമ്മ സേനയും പദ്ധതിയുമായി സഹകരിക്കുന്നുണ്ട്. ജൈവവളം സ്വകാര്യ ഏജൻസിക്ക് കൈമാറും. നാല് കമ്പോസ്റ്റ് ബിന്നുകളടങ്ങിയ ഒരു യൂണിറ്റാണ് സ്‌കൂളുകളിൽ സ്ഥാപിച്ചിരിക്കുന്നത്. പ്ലാസ്റ്റിക് കുപ്പികൾ, ചില്ലു കുപ്പികൾ, പ്ലാസ്റ്റിക് കവറുകൾ, കടലാസുകൾ എന്നിവ വേർതിരിച്ച് സംസ്‌കരിക്കുന്നതിന് ബോട്ടിൽ ബൂത്തുകളും സജ്ജീകരിച്ചിട്ടുണ്ട്. സ്‌കൂളുകൾ ഹരിത വിദ്യാലയങ്ങളാക്കുന്നതിനുള്ള പ്രവർത്തനങ്ങളും പുരോഗമിക്കുന്നു.