മരങ്ങാട്ടുപിള്ളി: പ്ലാസ്റ്റിക് മാലിന്യങ്ങൾ പൂർണമായി ഒഴിവാക്കുന്നതിന് ലക്ഷ്യമിട്ട് മരങ്ങാട്ടുപിള്ളി ഗ്രാമപഞ്ചായത്തിൽ തുടക്കം കുറിച്ച ക്ലീൻ മരങ്ങാട്ടുപിള്ളി മൂവ്‌മെന്റ് സജീവമാകുന്നു. പ്ലാസ്റ്റിക് ക്യാരി ബാഗുകളുടെ ഉപയോഗം പൊതുജന പങ്കാളിത്തത്തോടെ കുറയ്ക്കാനാണ് ആദ്യഘട്ടത്തിൽ ലക്ഷ്യമിടുന്നത്. ഇതിന്റെ ഭാഗമായി 14 വാർഡുകളിൽ തുണി സഞ്ചികൾ സൗജന്യമായി വിതരണം ചെയ്തു. ജലാശയ സംരക്ഷണം, പ്ലാസ്റ്റിക് നിർമാർജ്ജനം, ഉറവിട മാലിന്യ സംസ്‌കരണം, ഹരിത സാക്ഷരത എന്നിവയ്ക്ക് മുൻഗണന നൽകിയുള്ള പ്രവർത്തനങ്ങൾക്കാണ് പദ്ധതി പ്രാധാന്യം നൽകുന്നത്. ഈ വിഷയങ്ങൾ ശുചിത്വ ഗ്രാമസഭകളിൽ അവതരിപ്പിച്ച് ജനങ്ങളുടെ സഹകരണത്തോടെയാണ് പ്രവർത്തനരേഖ തയ്യാറാക്കിയിരിക്കുന്നത്. പുനരുപയോഗപ്രദമായ സാധനങ്ങൾ വാങ്ങുന്നതിനും വിൽക്കുന്നതിനും പൊതുജനങ്ങൾക്കായി പഞ്ചായത്തിൽ ഉടൻ സ്വാപ് ഷോപ്പ് ആരംഭിക്കും. ഹരിത കേരളം മിഷനുമായി ചേർന്ന് പഞ്ചായത്ത് പരിധിയിലെ സ്‌കൂളുകളിൽ തുമ്പൂർമൂഴി മാലിന്യ സംസ്‌കരണ പ്ലാന്റുകൾ സ്ഥാപിക്കും. വീടുകളിൽ നിന്നും വ്യാപാര സ്ഥാപനങ്ങളിൽ നിന്നും പ്ലാസ്റ്റിക് മാലിന്യങ്ങൾ ഹരിത കർമ്മസേന മുഖേന എല്ലാ മാസവും ശേഖരിക്കുന്നുണ്ട്. ഇത് ഉഴവൂർ ബ്ലോക്കിലെ പ്ലാസ്റ്റിക്ക് ഷ്രെഡിംഗ് യൂണിറ്റിലേക്കാണ് മാറ്റുന്നത്. കുടുംബശ്രീയുടെ സഹകരണവും പദ്ധതിക്കുണ്ട്.