കോട്ടയം : പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി ജില്ലാ പഞ്ചായത്ത് ആവിഷ്‌കരിച്ച സമഗ്ര വിദ്യാഭ്യാസ പരിപാടി ഏബിൾ 2 വിജയോത്സവം മണർകാട് ഇൻഫന്റ് ജീസസ് സ്‌കൂളിൽ ജില്ലാ പഞ്ചായത്ത് പ്രസിഡന്റ് അഡ്വ. സെബാസ്റ്റ്യൻ കുളത്തുങ്കൽ ഉദ്ഘാടനം ചെയ്തു. മണർകാട് ഗ്രാമപഞ്ചായത്ത് പ്രസിഡന്റ് റെജി എം. ഫിലിപ്പോസ് അദ്ധ്യക്ഷത വഹിച്ചു. പൊതുവിദ്യാഭ്യാസ സംരക്ഷണ യജ്ഞം സംസ്ഥാന മിഷൻ കോ-ഓർഡിനേറ്റർ ഡോ. രതീഷ് കാളിയാടൻ വിഷയം അവതരിപ്പിച്ചു. ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അദ്ധ്യക്ഷ ലിസമ്മ ബേബി, ജില്ലാ പഞ്ചായത്തംഗം ജയേഷ് മോഹൻ, വിദ്യാഭ്യാസ ഡെപ്യൂട്ടി ഡയറക്ടർ ടി.കെ. അജിതകുമാരി, വിദ്യാഭ്യാസ സംരക്ഷണ യജ്ഞം ജില്ലാ കോ-ഓർഡിനേറ്റർ കെ.ജെ. പ്രസാദ്, സമഗ്ര ശിക്ഷ ജില്ലാ പ്രോജക്ട് ഓഫീസർ മാണി ജോസഫ്, ജില്ലാ വിദ്യാഭ്യാസ ഓഫീസർ ഉഷാ ഗോവിന്ദ് തുടങ്ങിയവർ സംസാരിച്ചു.

പദ്ധതി ചെലവ് : 1.10 കോടി

പദ്ധതി ഇങ്ങനെ

ജില്ലയിലെ തിരഞ്ഞെടുക്കപ്പെട്ട സ്‌കൂളുകളിൽ ഒന്ന് മുതൽ പ്ലസ് ടു വരെ പഠിക്കുന്ന കുട്ടികൾക്ക് പ്രയോജനം ലഭിക്കുന്ന വിധമാണ് സമഗ്ര വിദ്യാഭ്യാസപരിപാടി നടപ്പാക്കുന്നത്. പ്ലസ് ടു വിദ്യാർഥികൾക്ക് കരിയർ ഗൈഡൻസ്, എസ്.എസ്.എൽ.സി വിജയശതമാനം വർദ്ധിപ്പിക്കൽ, 8, 9 ക്ലാസുകളിലെ വിദ്യാർത്ഥികൾക്ക് പ്രത്യേക ഇംഗ്ലീഷ് പരിശീലനം, തൊഴിൽ പരിശീലനം, അഭിരുചി നിർണയം, യു.പി, പ്രൈമറി തലങ്ങളിൽ അക്കാദമിക് നിലവാരം വർദ്ധിപ്പിക്കൽ തുടങ്ങിയവയാണ് പദ്ധതിയുടെ ഭാഗമായി നടപ്പാക്കുക.

പദ്ധതിയിലേക്ക് 56 പ്രൈമറി സ്‌കൂളുകളും, 40 ഹൈസ്‌കൂളുകളും തിരഞ്ഞെടുത്തിട്ടുണ്ട്. ജില്ലയെ നാലു മേഖലകളായി തിരിച്ചാണ് പ്രാഥമിക പരിശീലനം. ഹെഡ്മാസ്റ്റർമാർ, പി.ടി.എ പ്രസിഡന്റുമാർ, മദർ പി.ടി.എ പ്രതിനിധികൾ, വാർഡ് മെബർമാർ എന്നിവർ പങ്കെടുക്കും.