ന്യൂഡല്‍ഹി: എ.ഐ.സി.സി ജനറൽ സെക്രട്ടറി പ്രിയങ്ക ഗാന്ധിയുടെ പേരിന് പകരം സിനിമാ താരം പ്രിയങ്ക ചോപ്രയുടെ പേര് പറഞ്ഞ് മുദ്രാവാക്യം വിളിച്ചാൽ എങ്ങനെയിരിക്കും. കഴിഞ്ഞ ദിവസം കോൺഗ്രസ് നേതാവിനാണ് ഈ അബദ്ധം പറ്റിയത്. സോഷ്യൽ മീഡിയയിൽ മുദ്രാവാക്യം വിളിയുടെ വീഡിയോ വെെറലാണ്. കോണ്‍ഗ്രസിന്റെ ഡല്‍ഹിയില്‍ സംഘടിപ്പിച്ച പരിപാടിയിലാണ് കോണ്‍ഗ്രസ് നേതാവിന് അബദ്ധം പിണഞ്ഞത്. കോണ്‍ഗ്രസ് നേതാക്കളുടെ പേരില്‍ നേതാവ് സിന്ദാബാദ് വിളിക്കുകയായിരുന്നു. തുടർന്നാണ് അബദ്ധത്തിൽ പ്രിയങ്ക ചോപ്രയുടെ പേര് വിളിച്ചത്.

'സോണിയാ ഗാന്ധി സിന്ദാബാദ്, കോണ്‍ഗ്രസ് പാര്‍ട്ടി സിന്ദാബാദ്, രാഹുല്‍ ഗാന്ധി സിന്ദാബാദ്' എന്നിങ്ങനെ വിളിക്കുകയും പ്രവര്‍ത്തകര്‍ അത് ഏറ്റുവിളിക്കുകയും ചെയ്തു. അടുത്ത പേരിലാണ് 'പ്രിയങ്ക ഗാന്ധി സിന്ദാബാദ്' എന്നതിനു പകരം 'പ്രിയങ്ക ചോപ്ര സിന്ദാബാദ്' എന്ന് മുദ്രാവാക്യം മുഴക്കിയത്.

ഡൽഹിയിലെ പ്രാദേശിക കോൺഗ്രസ് നേതാവ് സുരേന്ദർകുമാർ ആണ് പ്രിയങ്ക ചോപ്രക്ക് സിന്ദാബാദ് വിളിച്ചത്. കോണ്‍ഗ്രസ് നേതാവ് സുഭാഷ് ചോപ്രയും സമീപത്തുണ്ടായിരുന്നു. അപ്രതീക്ഷിതമായ നാവു പിഴയില്‍ തൊട്ടടുത്തു നിന്ന സുരേന്ദ്ര കുമാര്‍ ഞെട്ടുന്നതും മുദ്രാവാക്യം വിളിക്കുന്ന നേതാവിനെ നോക്കുന്നതും വീഡിയോയില്‍ കാണാം. അബദ്ധം സുഭാഷ് ചോപ്ര ശ്രദ്ധയില്‍പ്പെടുത്തിയപ്പോള്‍ സുരേന്ദര്‍ കുമാര്‍ മാപ്പ് പറയുകയും ചെയ്തു. എന്നാൽ,​ വിഡിയോ വ്യാപകമായി പ്രചരിക്കുകയായിരുന്നു.

#WATCH Delhi: Slogan of "Sonia Gandhi zindabad! Congress party zindabad! Rahul Gandhi zindabad! Priyanka Chopra zindabad!" (instead of Priyanka Gandhi Vadra) mistakenly raised by Congress' Surender Kr at a public rally. Delhi Congress chief Subhash Chopra was also present.(01.12) pic.twitter.com/ddFDuZDTwH

— ANI (@ANI) December 1, 2019