എസ്. ബി.ഐ കേരള Vs ഗോകുലം എഫ്.സി മത്സരം വൈകിട്ട് 3.45 മുതൽ ചന്ദ്രശേഖരൻ നായർ സ്റ്റേഡിയത്തിൽ
തിരുവനന്തപുരം : ഇന്ന് നടക്കുന്ന മേയേഴ്സ് ഗോൾഡ് കപ്പ് ഫുട്ബാളിന്റെ ഫൈനലിൽ എസ്. ബി.ഐ കേരളയും ഗോകുലം എഫ്.സിയും ഏറ്റുമുട്ടും. വൈകിട്ട് 3.45 മുതൽ ചന്ദ്രശേഖരൻ നായർ സ്റ്റേഡിയത്തിലാണ് ഫൈനൽ.
ആദ്യസെമിയിൽ കേരള പൊലീസിനെ പെനാൽറ്റി ഷൂട്ടൗട്ടിൽ കീഴടക്കിയാണ് ഗോകുലം ഫൈനലിലെത്തിയത്. രണ്ടാം സെമി ഫൈനലിൽ കെ.എസ്.ഇ.ബി യെ മറുപടിയില്ലാത്ത മൂന്ന് ഗോളുകൾക്ക് കീഴടക്കിയാണ് എസ്.ബി.ഐ കേരള ഫൈനലിന് ടിക്കറ്റെടുത്തത്.
സെമിഫൈനലിൽ സമ്പൂർണാധിപത്യം പുലർത്തിയാണ് എസ്.ബി.ഐ വിജയം കണ്ടത്. കഴിഞ്ഞദിവസം ധൻബാദ് എഫ്.എയ്ക്കെതിരെ മറുപടിയില്ലാത്ത പത്തു ഗോളുകൾ അടിച്ചുകൂട്ടിയിരുന്ന വി.പി. ഷാജി പരിശീലിപ്പിക്കുന്ന എസ്.ബി.ഐ സെമിയിൽ അതിന്റെ തുടർച്ചയെന്നോണം മൂന്നാം മിനിട്ടിൽ തന്നെ സ്കോർ ചെയ്തു. സ്റ്റീഫൻ ദാസായിരുന്നു ഗോൾ നേടിയത്. 81-ാം മിനിട്ടിൽ ജിജോ ജോസഫും 89-ാം മിനിട്ടിൽ മിഥുനുമാണ് മറ്റ് ഗോളുകൾ നേടിയത്.