എഴുകോൺ (കൊല്ലം): വീടിനു മുന്നിലെ കിണറ്റിൽ വീണ് രണ്ടര വയസുകാരൻ മരിച്ചു. ഇരുമ്പനങ്ങാട് മാറനാട് പള്ളിമുക്കിൽ സുനിൽ സദനത്തിൽ സൈനികനായ സുനിൽ കുമാറിന്റെയും നിഷയുടെയും മകൻ അഭിനവാണ് (രണ്ടര) മരിച്ചത്.

ഇന്നലെ ഉച്ചയ്ക്ക് 12.30 നായിരുന്നു അപകടം. തീരെ ഉയരം കുറഞ്ഞതാണ് കിണറിന്റെ ആൾമറ. തൊട്ടടുത്ത പുരയിടത്തിൽ നിന്ന് മഴയത്ത് ഒലിച്ചുവന്ന മണ്ണ് കിണറിനോട് ചേർന്ന് അടിഞ്ഞുകൂടിയിരുന്നു. വീട്ടുമുറ്റത്ത് പശുവിന് വെള്ളം കൊടുത്തുകൊണ്ട് നിന്നിരുന്ന അമ്മൂമ്മയുടെ സമീപത്ത് നിൽക്കുകയായിരുന്ന അഭിനവ് അടിഞ്ഞുകൂടിയ മണ്ണിനു മുകളിലൂടെ നടന്നപ്പോൾ കാൽതെറ്റി കിണറ്റിലേക്ക് വീഴുകയായിരുന്നു.

വീട്ടുകാരുടെ നിലവിളികേട്ട് ഓടിക്കൂടിയ നാട്ടുകാർ കുട്ടിയെ പുറത്തെടുത്ത് കൊല്ലത്തെ സ്വകാര്യ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സൈനികനായ പിതാവ് സുനിൽകുമാർ രണ്ടു ദിവസം മുൻപാണ് അവധിക്ക് നാട്ടിൽ വന്നത്. അക്ഷയ് സഹോദരനാണ്‌. സംസ്കാരം ഇന്ന് രാവിലെ 11ന്.