ന്യൂഡൽഹി: പശ്ചിമ ആഫ്രിക്കയിൽ കടൽക്കൊള്ളക്കാർ ഇന്ത്യക്കാരടങ്ങുന്ന കപ്പൽ തട്ടിയെടുത്തു. നെെജീരിയയിലെ ബോണി ദ്വീപിന് സമീപമാണ് സംഭവം. കപ്പലിൽ 18 ഇന്ത്യക്കാർ കുടുങ്ങിയതായാണ് റിപ്പോർട്ട്. ഇന്ത്യക്കാരുടെ വിവരങ്ങൾ ശേഖരിച്ചു വരികയാണെന്ന് കേന്ദ്രസർക്കാർ അറിയിച്ചു.

മേഖലയിൽ കപ്പലുകളുടെ നീക്കം നിരീക്ഷിക്കുന്ന ഏജൻസിയായ എ.ആർ.എക്സ് മാരിടൈം ആണ് ഇക്കാര്യം അറിയിച്ചത്. കപ്പലിൽ സുരക്ഷാ ജീവനക്കാർ ഉണ്ടായിരുന്നില്ല. ജീവനക്കാർ സുരക്ഷിതരാണെന്നാണ് പുറത്തു വരുന്ന വിവരങ്ങൾ. ഇന്ത്യൻ എംബസി നൈജീരിയൻ അധികൃതരോട് റിപ്പോർട്ട് തേടിയിട്ടുണ്ട്. ഇന്ത്യക്കാരെ രക്ഷിക്കാൻ അവശ്യമായ നടപടികൾ സ്വീകരിച്ചതായി അധികൃതർ പറഞ്ഞു.