ചക്കുളത്തുകാവ്: സ്ത്രീകളുടെ ശബരിമലയായ ചക്കുളത്തുകാവ് ശ്രീ ഭഗവതി ക്ഷേത്രത്തിലെ പൊങ്കാല നിലവറ ദീപം തെളിഞ്ഞു. 10നാണ് പൊങ്കാല

ചക്കുളത്തുകാവ് ക്ഷേത്ര മൂലസ്ഥാനമായ പട്ടമന ഇല്ലത്തെ മൂല കുടുംബക്ഷേത്ര നടയിൽ നിന്ന് രാവിലെ 9ന് ക്ഷേത്രം മുഖ്യകാര്യദർശി രാധാകൃഷ്ണൻ നമ്പൂതിരി തെളിച്ച ദീപം വാദ്യമേളങ്ങളുടെയും വായ്ക്കുരവകളുടെയും അകമ്പടിയോടെ ക്ഷേത്ര ഗോപുരനടയിലെ വിളക്കിലേക്ക് ക്ഷേത്രം കാര്യദർശി മണിക്കുട്ടൻ നമ്പൂതിരി പകർന്നു. ക്ഷേത്രം അഡ്മിനിസ്‌ട്രേറ്റർ അഡ്വ. കെ.കെ. ഗോപാലകൃഷ്ണൻ നായർ, പി.ആർ.ഒ സുരേഷ് കാവുംഭാഗം, ജയസൂര്യ നമ്പൂതിരി, രഞ്ജിത്ത് ബി. നമ്പൂതിരി, രമേശ് ഇളമൺ നമ്പൂതിരി, അജിത്ത് പിഷാരത്ത്, അഡ്വ. പി.എസ്. മുരളീധരൻ നായർ എന്നിവർ പങ്കെടുത്തു.
പൊങ്കലദിവസം പുലർച്ചെ 4 ന് ഗണപതിഹോമവും നിർമ്മാല്യദർശനവും, 8.30 ന് വിളിച്ചു ചൊല്ലി പ്രാർത്ഥന, രാവിലെ 9 ന് മണിക്കുട്ടൻ നമ്പൂതിരിയുടെ അദ്ധ്യക്ഷതയിൽ നടക്കുന്ന ആദ്ധ്യാത്മിക സംഗമം രാധാകൃഷ്ണൻ നമ്പൂതിരി ഉദ്ഘാടനം ചെയ്യും. പൊങ്കാലയുടെ ഉദ്ഘാടനം ഹിന്ദു മഹാമണ്ഡലം പ്രസിഡന്റ് പി.എസ്. നായർ നിർവഹിക്കും. ദേവസം കമ്മിഷണർ ഹർഷൻ മുഖ്യാതിഥിയാവും.