ന്യൂഡൽഹി: ഒമ്പതു മാസത്തെ ഇടവേളയ്ക്ക് ശേഷം രാജ്യത്തെ ഏറ്രവും വലിയ വാഹന നിർമ്മാണ കമ്പനിയായ മാരുതി സുസുക്കി ഉത്‌പാദനം ഉയർത്തി. നവംബറിൽ 4.33 ശതമാനമാണ് ഉത്പാദന വർദ്ധന. വില്‌പനമാന്ദ്യം മൂലമാണ് മാരുതിക്ക് നേരത്തേ തുടർച്ചയായി ഉത്‌‌പാദനം കുറയ്ക്കേണ്ടി വന്നത്.

നവംബറിൽ 1.41 ലക്ഷം യൂണിറ്റുകളാണ് മാരുതി ഉത്പാദിപ്പിച്ചത്. 2018 നവംബറിൽ 1.35 ലക്ഷം യൂണിറ്റുകളായിരുന്നു ഉത്‌പാദനം. കഴിഞ്ഞമാസം പാസഞ്ചർ വാഹന ഉത്‌പാദനം 1.34 ലക്ഷം യൂണിറ്റുകളിൽ നിന്ന് 3.67 ശതമാനം വർ‌ദ്ധിച്ച് 1.39 ലക്ഷമായി. അതേസമയം, മിനി/കോംപാക്‌റ്ര് കാറുകളായ ഓൾട്ടോ, വാഗൺആർ, സെലെറിയോ, ഇഗ്നിസ്, സ്വിഫ്‌റ്ര്, ബലേനോ, ഡിസയർ എന്നിവയുടെ ഉത്‌പാദനം 30,129 യൂണിറ്റുകളിൽ നിന്ന് 24,052 യൂണിറ്റുകളായി താഴ്‌ന്നു. 20.16 ശതമാനമാണ് കുറവ്.

യൂട്ടിലിറ്റി ശ്രേണിയിലെ വിറ്രാര ബ്രെസ, എസ്-ക്രോസ്, എർട്ടിഗ എന്നിവയുടെ ഉത്‌പാദനം 23,038 യൂണിറ്റുകളിൽ നിന്ന് 18 ശതമാനം ഉയർന്ന് 27,187 യൂണിറ്റുകളിലെത്തി. മിഡ്-സൈസ് സെഡാനായ സിയസിന്റെ ഉത്‌പാദനം 1,460ൽ നിന്ന് 1,830 യൂണിറ്റുകളായും ഉയർന്നു. ചെറു വാണിജ്യ വാഹനമായ സൂപ്പർ ക്യാരി 1,797ൽ നിന്ന് 2,750 യൂണിറ്റുകളിലേക്കും ഉത്പാദന നേട്ടം കുറിച്ചു.