കൊച്ചി ∙ മറൈൻ ഡ്രൈവിൽ ജോലിക്കിടെ കാറിടിച്ച് തെറിപ്പിച്ച വനിതാ ട്രാഫിക് പൊലീസുകാരിൽ ഒരാളുടെ നില ഗുരുതരം. പിങ്ക് പട്രോളിങ് വിഭാഗത്തിലെ ഹേമചന്ദ്ര, ബിനു എലിസബത്ത് എന്നീ പൊലീസ് ഉദ്യോഗസ്ഥകൾക്കാണ് അപകടമുണ്ടായത്. ഇരുവരെയും അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. തലയ്ക്ക് സാരമായി പരുക്കേറ്റ ഹേമചന്ദ്രയുടെ നില ഗുരുതമാണ്.

ഇടിയുടെ ശക്തിയിൽ ഹേമചന്ദ്രയുടെ തല കാറിന്റെ ചില്ലിൽ ഇടിച്ച് ചില്ല് തകർന്നു. രാവിലെ പിങ്ക് പട്രോളിംഗിനുള്ള വാഹനം വരുന്നത് കാത്തിരിക്കുന്നതിനിടെ റോഡിന് മറുവശത്തുള്ള കടയിലേക്ക് നടന്നപ്പോഴാണ് അപകടം ഉണ്ടായത്. സംഭവത്തിന്റെ സിസിടിവി ദൃശ്യം പുറത്തുവന്നു. നാവികസേനാ ഉദ്യോഗസ്ഥനായ കാർ ഡ്രൈവർക്കെതിരെ പൊലീസ് കേസെടുത്തു.