ന്യൂഡൽഹി: പാർലമെന്റ് ​പാസാക്കിയ പൗരത്വ ഭേദഗതി ബില്ലിൽ അസാമിലെ ജനങ്ങൾക്ക്​ ആശങ്ക വേണ്ടെന്ന പ്രധാനമന്ത്രി നരേന്ദ്രമോദിയുടെ ട്വിറ്റർ സന്ദേശത്തെ പരിഹസിച്ച്​ കോൺഗ്രസ് രംഗത്തെത്തി​. ഇന്റെർനെറ്റ്​ ബന്ധം വിഛേദിക്കപ്പെട്ടതിനാൽ അസാമിലെ സഹോദരങ്ങൾക്ക്​ മോദിയുടെ സന്ദേശം വായിക്കാൻ കഴിയില്ല എന്നാണ്​ കോൺ​ഗ്രസ്​ റീട്വീറ്റ്​ ചെയ്​തത്​.

‘‘അസാമിലുള്ള നമ്മുടെ സഹോദരീ സഹോദരൻമാർക്ക്​ താങ്കളുടെ സമാശ്വാസ സന്ദേശം വായിക്കാൻ കഴിയില്ല. അവരുടെ ഇന്റെർനെറ്റ്​ ബന്ധം വിഛേദിക്കപ്പെട്ടതാണെന്ന്​ താങ്കൾ മറന്നുപോയി’’ -എന്നാണ്​ കോൺഗ്രസ്​ ഔദ്യോഗിക ട്വിറ്റർ പേജിൽ കുറിച്ചത്​.

‘നിങ്ങളുടെ അവകാശങ്ങള്‍ ഞങ്ങള്‍ സംരക്ഷിക്കും അസം ജനത ശാന്തരാകണം’ എന്നായിരുന്നു അസാം ജനതയോട് മോദി ട്വിറ്ററിലൂടെ ആവശ്യപ്പെട്ടത്. അസാമില്‍ പൗരത്വ ഭേദഗതി ബില്ലിനെതിരെ ആയിരക്കണക്കിന് ആളുകള്‍ കര്‍ഫ്യൂ അവഗണിച്ചുകൊണ്ട് തെരുവില്‍ പ്രതിഷേധം തുടരുന്ന സാഹചര്യത്തിലായിരുന്നു പ്രധാനമന്ത്രിയുടെ ട്വീറ്റ്.

Our brothers & sisters in Assam cannot read your 'reassuring' message Modiji, in case you've forgotten, their internet has been cut off. https://t.co/mWzR9uPgKh

— Congress (@INCIndia) December 12, 2019