ദിവസങ്ങളായി രാജ്യം മുഴുവൻ പൗരത്വ നിയമഭേദഗതിയെച്ചൊല്ലിയുള്ള ചർച്ചയിലാണ്. തർക്കങ്ങൾക്കൊടുവിൽ ലോക്‌സഭയും രാജ്യസഭയും പാസാക്കിയ ഈ ബില്ലിൽ രാഷ്ടപതി ഒപ്പുവച്ചതോടെ ഇത് നിയമമായി മാറും. ഈ ബില്ലിനെതിരെ പ്രതിഷേധം അലയടിക്കുകയാണ്. എന്നാൽ വിവാദമായ ഈ ബില്ലിന് ആധാരമായത് ഒരു പുസ്തകമാണെന്ന് പറഞ്ഞാൽ വിശ്വസിക്കാൻ പറ്റുമോ?​

1939ൽ പ്രസിദ്ധീകരിച്ച ഗോൾവാൽക്കറുടെ പുസ്തകവും അതിലെ 47,​48 പേജുകളും പൗരത്വ നിയമഭേദഗതിയെ സംബന്ധിച്ച് വളരെ നിർണായകമാണ്. 'നാം അഥവാ നമ്മുടെ രാഷ്ട്രം നിർവചിക്കപ്പെടുന്നു'വെന്നതാണ് പുസ്തകത്തിന്റെ പേര്. ഗോൾവാൽക്കർ അന്ന് നിർവചിച്ച ഹിന്ദു രാഷ്ട്രത്തിന്റെ പ്രമാണമാണ് മാരത്തൺ ചർച്ചകൾക്കൊടുവിൽ പാർലമെന്റ് പാസാക്കിയ പൗരത്വ നിയമം.

ഈ പുസ്തകത്തിലെ 47ാം പേജിൽ പറയുന്നത് ഇതാണ് -ഹിന്ദുരാഷ്ട്രത്തെ മഹത്വവൽക്കരിക്കുക എന്നതല്ലാതെ മറ്റൊരു ആശയവും വെച്ചുപൊറുപ്പിക്കരുത്. മാത്രമല്ല അവർ ഹിന്ദു വംശത്തിൽ ലയിക്കുകയും വേണം. അതല്ലായെങ്കിൽ ഹിന്ദു രാഷ്ട്രത്തിന് പൂർണമായി കീഴടങ്ങണമെന്നൊക്കെയാണ്.