ന്യൂഡൽഹി: ഉപഭോക്തൃ വിപണിക്ക് കരുത്തേകി,​ സമ്പദ്‌വളർച്ചയ്ക്ക് ഉണർവേകാൻ ധനമന്ത്രാലയം പ്രഖ്യാപിച്ച ഉത്തേജക പദ്ധതികൾ ഫലം കണ്ടുതുടങ്ങിയെന്ന് ധനമന്ത്രി നിർമ്മല സീതാരാമൻ,​ മുഖ്യ സാമ്പത്തിക ഉപദേശകൻ കൃഷ്‌ണമൂർത്തി സുബ്രഹ്മണ്യൻ എന്നിവർ പറഞ്ഞു. ആറരവർഷത്തെ താഴ്‌ചയിലേക്ക് കൂപ്പുകുത്തിയ ജി.ഡി.പി വളർച്ചയെ നേട്ടത്തിലേറ്റാൻ മന്ത്രാലയം സ്വീകരിച്ച നടപടികൾ മാദ്ധ്യമങ്ങൾക്ക് മുന്നിൽ വിശദീകരിക്കുകയായിരുന്നു ഇരുവരും.

ഇന്ത്യയെ 2024ഓടെ അഞ്ചുലക്ഷം കോടി ഡോളർ സമ്പദ്‌വ്യവസ്ഥയാക്കി മാറ്റാനും ചെറുകിട-ഇടത്തരം വ്യവസായ സംരംഭങ്ങൾക്ക് പിന്തുണയേകാനും സ്വീകരിച്ച നടപടികളും സുബ്രഹ്‌മണ്യൻ വിശദീകരിച്ചു. സമ്പദ്‌വ്യവസ്ഥയ്ക്ക് അനിവാര്യമെന്ന് തോന്നുന്ന വേളകളിൽ കൂടുതൽ ഉത്തേജക പദ്ധതികൾ സർക്കാർ പ്രഖ്യാപിക്കുമെന്ന് നിർമ്മല സീതാരാമൻ പറഞ്ഞു.

സംസ്ഥാനങ്ങൾക്കുള്ള ജി.എസ്.ടി കുടിശിക ഉടൻ വീട്ടുമെന്ന് പറഞ്ഞ ധനമന്ത്രി,​ അതെപ്പോഴുണ്ടാകുമെന്ന് വ്യക്തമാക്കിയില്ല. ജി.എസ്.ടി നിരക്കുകൾ ഉയർത്തുമോ എന്ന ചോദ്യത്തിന്,​ അതേക്കുറിച്ച് തന്റെ ഓഫീസ് ചർച്ചകളൊന്നും നടത്തിയിട്ടില്ലെന്ന് നിർമ്മല പറഞ്ഞു. മഴക്കെടുതിയും വെള്ളപ്പൊക്കവും മൂലം വിളവ് നശിച്ചതാണ് ഉള്ളി വില പരിധിവിട്ടുയരാൻ കാരണം. വില കുറഞ്ഞു തുടങ്ങിയിട്ടുണ്ടെന്നും മന്ത്രി പറഞ്ഞു.

ഉത്തേജകവും നേട്ടവും

 സാമ്പത്തിക പ്രതിസന്ധി നേരിടുന്ന ബാങ്കിതര ധനകാര്യ സ്ഥാപനങ്ങൾക്കും (എൻ.ബി.എഫ്.സി) ഭവന വായ്‌പാ കമ്പനികൾക്കും (എച്ച്.എഫ്.സി)​ മൂലധനം ഉറപ്പാക്കാൻ 4.47 ലക്ഷം കോടി രൂപ പ്രഖ്യാപിച്ചു. ഇതിൽ 17 പ്രൊപ്പോസലുകളിലായി 7,​000 കോടി രൂപ ഇതിനകം അനുവദിച്ചു. 20,​000 കോടി രൂപയുടെ അനുമതി രണ്ടാഴ്‌ചയ്ക്കകം നൽകും.

 കോർപ്പറേറ്ര് നികുതി 35 ശതമാനത്തിൽ നിന്ന് 25 ശതമാനമായും പുതിയ കമ്പനികളുടേത് 15 ശതമാനമായും കുറച്ചു.

 എക്‌സ്‌റ്റേണൽ ബെഞ്ച്‌മാർച്ച് പ്രകാരം വായ്‌പാപലിശ നിർണയിക്കണമെന്ന റിസർവ് ബാങ്ക് നിർദേശം നടപ്പായശേഷം ബാങ്കുകൾ നവംബർ 27 വരെയുള്ള കണക്കുപ്രകാരം എട്ട് ലക്ഷം വായ്‌പകൾ (മൂല്യം 72,​201 കോടി രൂപ)​ വിതരണം ചെയ്‌തു.

 32 പോതുമേഖലാ സ്ഥാപനങ്ങൾക്ക് 98,​000 കോടി രൂപയും റെയിൽ,​ റോഡ് മന്ത്രാലയങ്ങൾക്ക് 2.46 ലക്ഷം കോടി രൂപയും അനുവദിച്ചു.

 പൊതുമേഖലാ ബാങ്കുകൾക്ക് 60,​314 കോടി രൂപയുടെ മൂലധനസഹായം നൽകി. ഈ ബാങ്കുകൾ വിതരണം ചെയ്‌തത് 2.2 ലക്ഷം കോടി രൂപയുടെ കോർപ്പറേറ്ര് വായ‌്പകളും 72,​985 കോടി രൂപയുടെ എം.എസ്.എം.ഇ വായ്‌പകളും.

 നിർമ്മാണം പാതിവഴിയിൽ നിലച്ച റിയൽ എസ്‌റ്രേറ്ര് പദ്ധതികൾക്ക് ഉണർവേകാൻ 25,​000 കോടി രൂപയുടെ ലാസ്‌‌റ്റ് മൈൽ ഫണ്ടിംഗ്.

 നികുതി റീഫണ്ടായി നടപ്പുവർഷം ഏപ്രിൽ-നവംബറിൽ നൽകിയത് 1.57 ലക്ഷം കോടി രൂപ. 27 ശതമാനമാണ് വർദ്ധന. ഇത് ഉപഭോക്തൃ വിപണിക്ക് കരുത്തേകുന്ന നടപടിയാണ്. കഴിഞ്ഞവർഷത്തെ സമാനകാലയളവിൽ റീഫണ്ട് 1.23 ലക്ഷം കോടി രൂപയാണ്.

 നേരിട്ടുള്ള വിദേശ നിക്ഷേപം ഏപ്രിൽ-നവംബറിൽ 3,​500 കോടി ഡോളർ കവിഞ്ഞു. മുൻവർഷത്തെ സമാനകാലയളവിൽ ഇത് 3,​100 കോടി ഡോളറായിരുന്നു.

''ജി.എസ്.ടി നിരക്കുകൾ ഉയർത്തുന്നത് സംബന്ധിച്ച് ഇതുവരെ ചർച്ചകളൊന്നും നടന്നിട്ടില്ല. നിരക്കുയർത്തുമെന്ന് സംബന്ധിച്ച് ഇപ്പോൾ കേൾക്കുന്നതെല്ലാം ഊഹാപോഹം മാത്രമാണ്"",​

നിർമ്മല സീതാരാമൻ,​

ധനമന്ത്രി