ന്യൂഡൽഹി : പൗരത്വഭേദഗതിയിൽപ്രതിഷേധിച്ച് കേന്ദ്ര സാഹിത്യ അക്കാ‌ഡമി അവാർഡ് നിരസിക്കുമോ എന്ന ചോദ്യത്തിന് മറുപടിയുമായി ശശി തരൂർ എം.പി. ഇംഗ്ലീഷ് ഭാഷയിലെ മികച്ച കൃതിക്കുള്ള പുരസ്കാരമാണ് ശശി തരൂരിന്റെ 'ആൻ എറാ ഓഫ് ഡാർക്‌നെസ്' എന്ന പുസ്തകത്തിന് ലഭിച്ചത്.
സർക്കാരിനോടുള്ള വിയോജിപ്പ് കാരണം കുറച്ച് കാലം മുമ്പ് മുതിർന്ന എഴുത്തുകാർ പോലും പുരസ്കാരം തിരികെ നൽകിയപ്പോൾ അങ്ങനെ ചെയ്യരുതെന്ന് അവരോട് ഞാൻ പറഞ്ഞിരുന്നു. അതുകൊണ്ട് എന്റെ കാര്യത്തിലും പുരസ്കാരം തിരികെ നൽകുമോ എന്ന ചോദ്യം പോലും ഉദിക്കുന്നില്ല. അങ്ങനെ ചെയ്യാനുള്ള പ്രത്യേക കാരണമൊന്നും കാണുന്നില്ലെന്നും തരൂർ വ്യക്തമാക്കി. സാഹിത്യ അക്കാദമി പുരസ്കാരത്തെ സാഹിത്യപരമായ നേട്ടമായിട്ടാണ് ഞാൻ കാണുന്നത്. സർക്കാരിന് അതിൽ കാര്യമല്ല. പുരസ്കാരങ്ങളെ ബഹുമാനിക്കുന്ന സാഹിത്യ സമൂഹമാണ് നമ്മുടേത്. എത്ര അഭിമാനകരമായ പുരസ്കാരമാണ് ഞാൻ നേടിയതെന്ന് എല്ലാവര്‍ർക്കുമറിയാം. അഭിമാനിക്കാനുള്ള കാര്യവും അതുതന്നെയെന്ന് തരൂർ വ്യക്തമാക്കി.
പൗരത്വ നിയമ ഭേദഗതിക്കെതിരെ രാജ്യവ്യാപകമായി സമരം ശക്തമാകുമ്പോഴാണ് കോൺഗ്രസ് എം.പി ശശി തരൂരിന് കേന്ദ്ര സാഹിത്യ അക്കാദമി പുരസ്കാരം ലഭിക്കുന്നത്.