ന്യൂഡൽഹി; പ്രധാനമന്ത്രി നരേന്ദ്ര മോദിയുടെ പൊതുപരിപാടിക്ക് ഭീകരാക്രമണ ഭീഷണിയെന്ന് രഹസ്യാന്വേഷണ വിഭാഗം റിപ്പോർട്ട്. ന്യൂഡൽഹിയിലെ രാംലീല മൈതാനത്ത് ഞായറാഴ്ച നടക്കേണ്ട പരിപാടിക്കാണ് തീവ്രവാദ ഭീഷണിയുള്ളതായി രഹസ്യാന്വേഷണ വിഭാഗം വിവരം നൽകുന്നത്. ജെയ്‌ഷെ മുഹമ്മദ് ഭീകരരാണ് മോദിയെ ഉന്നം വയ്ക്കുന്നതെന്നാണ് റിപ്പോർട്ട്. ഈ വിവരം രഹസ്യാന്വേഷണ വിഭാഗം എസ്.പി.ജിയെ അറിയിച്ചിട്ടുണ്ട്.
മോദിയുടെ സുരക്ഷ ശക്തമാക്കുന്നതിനായി എസ്.പി.ജിക്കും ഡൽഹി പോലീസിനും ജാഗ്രതാ നിർദേശം ലഭിച്ചതനുസരിച്ച് നാളെ പരിപാടി നടക്കുന്ന രാംലീല മൈതാനത്ത് പഴുതടച്ച സുരക്ഷയാണ് ഒരുക്കുന്നത്. നിയമവിധേയമാക്കപ്പെട്ട ഡൽഹിയിലെ അനധികൃത കോളനികളുടെ ഔദ്യോഗിക പ്രഖ്യാപനത്തിനായുള്ള ചടങ്ങിൽ പങ്കെടുക്കുന്നതിനാണ് നാളെ പ്രധാനമന്ത്രി രാംലീല മൈതാനെത്തെത്തുന്നത്. അമ്പതിനായിരത്തിലേറെ ജനങ്ങൾ ഈ പരിപാടിൽ പങ്കെടുക്കുമെന്നാണ് കണക്കാക്കപ്പെടുന്നത്. ചടങ്ങിന്റെ വേദിയിൽ യാതൊരു പ്രതിഷേധവും നടക്കാതിരിക്കാൻ വൻ സുരക്ഷാ വലയവും ഡൽഹി പൊലീസ് തീർക്കും.