ന്യൂഡൽഹി: ദേശീയ പൗരത്വ നിയമഭേദഗതിക്ക് എതിരെ കോൺഗ്രസ് ഞായറാഴ്ച നടത്താനിരുന്ന പ്രതിഷേധ ധർണയ്ക്ക് അനുമതിയില്ല. രാജ്ഘട്ടിൽ നടത്താനിരുന്ന ധർണയ്ക്കാണ് പൊലീസ് അനുമതി നിഷേധിച്ചത്. പ്രധാനമന്ത്രി നരേന്ദ്ര മോദിയുടെ പരിപാടി രാം ലീല മൈതാനത്ത് നടക്കുന്നതിനാലാണ് അനുമതി നിഷേധിച്ചതെന്നാണ് വിവരം.
ഞായറാഴ്ച ഉച്ചയ്ക്ക് രണ്ടുമുതൽ എട്ടുവരെയാണ് ധർണ നടത്താൻ തീരുമാനിച്ചിരുന്നത്. ധർണയിൽ കോൺഗ്രസ് അദ്ധ്യക്ഷ സോണിയ ഗാന്ധി, ജനറൽ സെക്രട്ടറി പ്രിയങ്ക ഗാന്ധി, രാഹുൽ ഗാന്ധി എം.പി എന്നിവർ പങ്കെടുക്കുമെന്നും അറിയിച്ചിരുന്നു. ദേശീയ പൗരത്വ നിയമ പ്രതിഷേധംത്തിനിടെ ദക്ഷിണ കൊറിയൻ സന്ദര്‍ശനത്തിന് പോയ രാഹുൽ ഗാന്ധി തിരിച്ചെത്തിയതിന് ശേഷം പങ്കെടുക്കുന്ന പരിപാടിയാണിത്.