തിരുവനന്തപുരം: മലയാള സിനിമയിലെ എക്കാലത്തെയും മാസ് വില്ലൻ കീരിക്കാടൻ ജോസ്(മോഹൻരാജ്) അവശനിലയിൽ ആശുപത്രിയിൽ. തിരുവനന്തപുരം ജനറൽ ആശുപത്രിയിൽ ഒരു മാസത്തോളമായി ആശുപത്രിയിൽ ചികിത്സയിൽ കഴിയുകയാണ് അദ്ദേഹം. വൃക്ക സംബന്ധമായ രോഗവുമായാണ് ചികിത്സയ്ക്കായി എത്തിയതെങ്കിലും നിലവിലെ അവസ്ഥ ഗുരുതരമാണെന്നാണ് ആശുപത്രി വൃത്തങ്ങളിൽ നിന്നും ലഭിക്കുന്ന വിവരം. കിരീടം, ചെങ്കോൽ തുടങ്ങിയ ഒട്ടനവധി ചിത്രങ്ങളിലെ കരുത്തുറ്റ കഥാപാത്രങ്ങളിലൂടെ മലയാള സിനിമ പ്രേക്ഷകരുടെ മനസിൽ ചിരപ്രതിഷ്ഠ നേടിയ നടനാണ് മോഹൻരാജ് എന്ന കീരീക്കാടൻ ജോസ്.

കെ.മധു സംവിധാനം ചെയ്ത 'മൂന്നാം മുറ' എന്ന മോഹൻലാൽ ചിത്രത്തിൽ ഒരു വേഷം ചെയ്തുകൊണ്ടാണ് മോഹൻ രാജ് മലയാള സിനിമ മേഖലയിലേക്ക് കാലെടുത്ത് വച്ചത്. തന്റെ രണ്ടാമത്തെ ചിത്രമായ 'കിരീടത്തിട'ലെ പ്രകടനത്തിലൂടെ മലയാളത്തിലെ എക്കാലത്തെയും മികച്ച പ്രതിനായകനായി മോഹൻരാജ് മാറുകയായിരുന്നു. പിന്നീട് നിരവധി കഥാപാത്രങ്ങളിലൂടെ മലയാളി പ്രേക്ഷകന്റെ പ്രിയപ്പെട്ട നടന്മാരിലൊരാളായി മാറിയ അദ്ദേഹം 'ഹലോ' എന്ന ചിത്രത്തിലൂടെ ഹാസ്യവും കൈകാര്യം ചെയ്തു.