ബിയര്‍ കുടിക്കാം, മുങ്ങിക്കുളിക്കാം, നീന്തിത്തുടിക്കാം. ആശ്ചര്യപ്പെടേണ്ട. സംഗതി ഉള്ളതാണ്. ബിയറിൽ കുളിക്കാൻ അത്ര ആഗ്രഹമുണ്ടെങ്കിൽ വേഗം വിട്ടോ ആസ്ട്രിയയ്ക്ക്. ആസ്ട്രിയയിലെ ടാരന്‍സിലുള്ള സ്ക്ലോസ് സ്റ്റാർകെൻബർഗർ ബ്രൂവറിയാണ് പൂൾ ഒരുക്കിയിരിക്കുന്നത്. ലോകത്ത് മറ്റെവിടെയുമില്ലാത്ത അതീവ സവിശേഷമായ ഒരു ബ്രൂവറിയാണ് ഇത്. കുടിക്കാനും കുളിക്കാനും അങ്ങനെ എവിടെയും ബിയർ മാത്രം. ലോകത്തിൽ ആദ്യമായിട്ടാണ് ബിയർ പൂൾ സംവിധാനം ഒരുക്കിയിരിക്കുന്നത്.
700 വര്‍ഷത്തോളം പഴക്കമുള്ള സ്റ്റാർകെൻബർഗർ കാസ്റ്റിലിന്റെ ഉള്ളിലെ നിലവറയാണ് ബിയര്‍ പൂള്‍ ആയി മാറ്റിയിരിക്കുന്നത്. 13 അടി ആഴമുള്ള ഏഴോളം പൂളുകള്‍ ഇവിടെയുണ്ട്. എന്നാൽ, ടബ്ബിലെ ബീയര്‍ കുടിക്കാന്‍ സന്ദര്‍ശകര്‍ക്ക് അനുവാദമില്ല. പകരം വാറ്റുകേന്ദ്രത്തിലെ 10 തരം ബിയറുകളില്‍ ഒന്നു തിരഞ്ഞെടുത്തു പൂളിലിരുന്ന് ആസ്വദിക്കാം. ബാറിലേതിനു സമാനമായി അരണ്ട വെളിച്ചമാണു പൂളിന്. പൂളിലുള്ള ബിയറിനു നല്ല ചൂടാണ്.
രണ്ടു മണിക്കൂര്‍ നേരത്തേക്ക് പൂളിനുള്ളില്‍ ചെലവഴിക്കാന്‍ 18,500 ഇന്ത്യന്‍ രൂപയാണ് ചെലവാക്കേണ്ടത്. ഈ കുളിക്ക് ആരോഗ്യപരമായി ഒരുപാട് ഗുണങ്ങള്‍ ഉണ്ട് എന്നും പറയപ്പെടുന്നു. ബിയറില്‍ അടങ്ങിയിരിക്കുന്ന കാത്സ്യം, വിറ്റാമിനുകള്‍ തുടങ്ങിയവ ചര്‍മം മൃദുലമാക്കാന്‍ സഹായിക്കും. രക്തയോട്ടം കൂട്ടാനും ശരീരത്തിന് സ്വാസ്ഥ്യം നല്‍കാനും ബീയര്‍ കുളിക്ക് സാധിക്കുമത്രേ.