ന്യൂഡൽഹി: നടപ്പു സാമ്പത്തിക വർഷം (2019-20)​ പൊതുമേഖലാ സ്ഥാപനങ്ങളുടെ ഓഹരികൾ വിറ്രഴിച്ച് 1.05 ലക്ഷം കോടി രൂപ നേടുകയെന്ന കേന്ദ്രസർക്കാരിന്റെ ലക്ഷ്യം പൂവണിഞ്ഞേക്കില്ല. നടപ്പുവർഷം ഇതുവരെ 17,​364.26 കോടി രൂപ മാത്രമാണ് പൊതുമേഖലാ ഓഹരി വില്പനയിലൂടെ സർക്കാരിന് ലഭിച്ചത്.

എയർ ഇന്ത്യ,​ ബി.പി.സി.എൽ.,​ കണ്ടെയ്‌നർ കോർപ്പറേഷൻ ഒഫ് ഇന്ത്യ (കോൺകോർ)​ എന്നിവയാണ് ഈ വർഷം സർക്കാരിന്റെ വില്പന പട്ടികയിലുള്ള വമ്പൻ കമ്പനികൾ. എന്നാൽ,​ സാമ്പത്തിക വർഷം അവസാനിക്കാൻ ഒരു ത്രൈമാസം (ജനുവരി-മാർച്ച്)​ മാത്രം ശേഷിക്കേ,​ ഇവയുടെ വില്പന നടപടികൾ പൂർണമാകുമെന്ന പ്രതീക്ഷ ധനമന്ത്രാലയത്തിനുമില്ല. ഇവയുടെ വില്‌പന കൂടി ഉൾപ്പെടുത്തി,​ അടുത്ത സാമ്പത്തിക വർഷത്തെ (2020-21)​ പൊതുമേഖലാ ഓഹരി വില്പന വരുമാന ലക്ഷ്യം 1.50 ലക്ഷം കോടി രൂപയായി നിശ്‌ചയിക്കാൻ സർക്കാർ ആലോചിക്കുന്നുണ്ട്.

എയർ ഇന്ത്യ,​ ബി.പി.സി.എൽ.,​ കോൺകോർ എന്നിവയുടെ ഓഹരികൾ വിറ്റഴിക്കാനുള്ള പ്രത്യക്ഷ നടപടികളിലേക്ക് കേന്ദ്രം ഇനിയും കടന്നിട്ടില്ല. നടപ്പുവർഷം താത്പര്യപത്രം ക്ഷണിക്കുന്നത് ഉൾപ്പെടെയുള്ള നടപടികളെടുത്താലും,​ വില്പന പൂർണമാകാൻ അടുത്തവർഷം ആദ്യപകുതിയെങ്കിലും വേണ്ടിവരും. അതുകൊണ്ട്,​ നടപ്പുവർഷത്തെ ലക്ഷ്യത്തിൽ 50,​000 കോടി രൂപയുടെ വരെ കുറവും സർക്കാർ വിലയിരുത്തുന്നു. ഭെൽ,​ ഷിപ്പിംഗ് കോർപ്പറേഷൻ ഒഫ് ഇന്ത്യ തുടങ്ങിയവയാണ് നടപ്പുവർഷത്തെ വില്പന പട്ടികയിലുള്ള കമ്പനികൾ.

വൈകുന്നത് എന്തുകൊണ്ട്?​

എയർ ഇന്ത്യ,​ ബി.പി.സി.എൽ.,​ കോൺകോർ എന്നീ വൻ വില്പനകളാണ് ഈവർഷം സർക്കാർ ലക്ഷ്യമിടുന്നത്. വില്പന നടപടി ഇനിയും തുടങ്ങിയിട്ടില്ല. വില്‌പന നീക്കം ഉടൻ തുടങ്ങിയാലും സെബിയുടെ ഉൾപ്പെടെ മാനദണ്ഡങ്ങൾ പാലിച്ച് അത് പൂർണമാകാൻ സമയമെടുക്കും. നടപ്പുവർഷം ഇനി ശേഷിക്കുന്നത് മൂന്നുമാസം (ജനുവരി-മാർച്ച്)​ മാത്രമെന്നിരിക്കേ,​ ലക്ഷ്യം കാണാൻ സർക്കാരിന് കഴിഞ്ഞേക്കില്ല.

വലിയ കമ്പനികൾ;

വമ്പൻ ലക്ഷ്യങ്ങൾ

 എയർ ഇന്ത്യയുടെ 100 ശതമാനം ഓഹരികളും സർക്കാർ വിറ്രൊഴിയും. കഴിഞ്ഞവർഷം വില്പന നീക്കം നടത്തിയെങ്കിലും വാങ്ങാൻ ആരുമെത്തിയില്ല.

 ബി.പി.സി.എല്ലിൽ കേന്ദ്രത്തിനുള്ളത് 53.29 ശതമാനം ഓഹരികൾ. ഇതു പൂർണമായും വിറ്റഴിക്കും. ലക്ഷ്യം 60,​000 കോടി രൂപ.

 കണ്ടെയ്‌നർ കോർപ്പറേഷൻ ഒഫ് ഇന്ത്യയിൽ (കോൺകോർ)​ ഓഹരി പങ്കാളിത്തം 54.8 ശതമാനം. ഇതിൽ 30.8 ശതമാനം ഓഹരികൾ വിൽക്കും. പ്രതീക്ഷ 10,​300 കോടി രൂപ.

₹1.05 ലക്ഷം കോടി

നടപ്പുവർഷം പൊതുമേഖലാ ഓഹരി വില്പനയിലൂടെ സർക്കാർ ലക്ഷ്യമിടുന്നത് 1.05 ലക്ഷം കോടി രൂപ. ഇതുവരെ കീശയിലെത്തിയത് 17,​364.26 കോടി രൂപ.

₹80,​000 കോടി

കഴിഞ്ഞ സാമ്പത്തിക വർഷം ലക്ഷ്യം 80,​000 കോടി രൂപ ആയിരുന്നെങ്കിലും സർക്കാരിന് ഒരുലക്ഷം കോടി രൂപ ലഭിച്ചു.

ധനക്കമ്മി കൂടും!

നടപ്പുവർഷം ധനക്കമ്മി ജി.ഡി.പിയുടെ 3.3 ശതമാനമായി നിയന്ത്രിക്കുകയാണ് കേന്ദ്രത്തിന്റെ ലക്ഷ്യം. പൊതുമേഖലാ ഓഹരികൾ വിറ്റഴിച്ച് ലക്ഷ്യമിടുന്ന വരുമാനം നേടാനായില്ലെങ്കിൽ ധനക്കമ്മി 'നിയന്ത്രണരേഖ" കടന്ന് കുതിക്കും.