മുംബയ്: പത്തുലക്ഷം രൂപയ്ക്കുമേൽ ടിക്കറ്ര് നിരക്ക് കുടിശികയാക്കിയ കേന്ദ്രസർക്കാർ ഏജൻസികളെ എയർ ഇന്ത്യ കരിമ്പട്ടികയിൽ ഉൾപ്പെടുത്തി. സർക്കാർ ഏജൻസികൾക്കെതിരെ എയർ ഇന്ത്യയുടെ ഇത്തരം നടപടി ആദ്യമാണ്. ടിക്കറ്ര് നിരക്കിൽ പത്തുലക്ഷം രൂപയ്ക്കുമേൽ കുടിശിക വരുത്തിയ സി.ബി.ഐ.,​ എൻഫോഴ്‌സ്‌മെന്റ് ഡയറക്‌ടറേറ്ര് (ഇ.ഡി)​,​ ഇന്റലിജൻസ് ബ്യൂറോ (ഐ.ബി)​,​ കസ്‌റ്രംസ് കമ്മിഷണർമാർ,​ കൺട്രോളർ ഒഫ് ഡിഫൻസ് അക്കൗണ്ട്‌സ്,​ ബി.എസ്.എഫ് തുടങ്ങിയവയാണ് കരിമ്പട്ടികയിലുള്ളത്.

ടിക്കറ്ര് വാങ്ങിയ ഇനത്തിൽ ഇവയെല്ലാം കൂടി എയർ ഇന്ത്യയ്ക്ക് നൽകാനുള്ള കുടിശിക 268 കോടി രൂപയാണ്. ഈ സ്ഥാപനങ്ങളിലെ ഉദ്യോഗസ്ഥർക്ക് കുടിശിക വീട്ടുന്നതുവരെ എയർ ഇന്ത്യയിൽ യാത്ര ചെയ്യാനാവില്ല. സെൻട്രൽ ലേബർ ഇൻസ്‌റ്റിറ്ര്യൂട്ട്,​ ഇന്ത്യൻ ഓഡിറ്ര് ബോർഡ് തുടങ്ങിയവയും കരിമ്പട്ടികയിലുണ്ട്. കഴിഞ്ഞ ഏതാനും ആഴ്‌ചകളായി,​ കുടിശികക്കാരുടെ പട്ടിക തയ്യാറാക്കി പ്രത്യേക 'റിക്കവറി" കാമ്പയിൻ എയർ ഇന്ത്യ തുടങ്ങിയിരുന്നു. ഇതിലൂടെ 50 കോടി രൂപ തിരിച്ചുപിടിക്കുകയും ചെയ്‌തു.

കുടിശികക്കാർ ആണെങ്കിലും ഏതാനും സ്ഥാപനങ്ങളെ എയർ ഇന്ത്യ കരിമ്പട്ടികയിൽ ചേർത്തിട്ടില്ല. എയർപോർട്‌സ് അതോറിറ്റി ഒഫ് ഇന്ത്യ,​ ലോക്‌സഭ,​ കേന്ദ്ര വ്യോമയാന മന്ത്രാലയം,​ ലേബർ കമ്മിഷണർ എന്നിവയാണ് 'രക്ഷപ്പെട്ടത്". കേന്ദ്ര ഏജൻസി ഉദ്യോഗസ്ഥർ വ്യോമയാത്രയ്ക്ക് എയർ ഇന്ത്യയെയാണ് പരിഗണിക്കേണ്ടത്. എയർ ഇന്ത്യയ്ക്ക് സർവീസ് ഇല്ലാത്ത പാതയിൽ മാത്രമാണ് സ്വകാര്യ വിമാന കമ്പനികളെ സമീപിക്കുക.

കരിമ്പട്ടിക

സി.ബി.ഐ.,​

ഐ.ബി.,​

ഇ.ഡി.,​

ബി.എസ്.എഫ്.,​

കസ്‌റ്രംസ് കമ്മിഷണർമാർ

തുടങ്ങിയവർ.

₹268 കോടി

സർക്കാർ ഏജൻസികളിൽ നിന്ന് എയർ ഇന്ത്യയ്ക്ക് കിട്ടാനുള്ള ടിക്കറ്ര് നിരക്ക് കുടിശിക 268 കോടി രൂപ.

₹5.4 കോടി

മുംബയ് ആസ്ഥാനമായുള്ള കൺട്രോളർ ഒഫ് ഡിഫൻസ് അക്കൗണ്ട്‌സ് ആണ് ഏറ്റവും വലിയ കുടിശികക്കാരൻ! കുടിശിക 5.4 കോടി രൂപ. ഏറ്റവും കുറവ് കുടിശിക മുംബയ് സൂപ്രണ്ട് ഒഫ് പൊലീസ്; തുക 3,​811 രൂപ.