ആലപ്പുഴ: മാനഭംഗ ശ്രമത്തിനിടെ യുവതിയുടെ മാറിടം കടിച്ചുമുറിച്ച പ്രതിയ്ക്ക് പത്ത് വർഷം കഠിന തടവും ഒരു ലക്ഷത്തി ഇരുപതിനായിരം രൂപ പിഴയും വിധിച്ചു. കേസിലെ പ്രതിയായ പുന്നപ്ര സ്വദേശിയായ നജ്മലിനെയാണ് ആലപ്പുഴ അഡീഷണൽ ജില്ലാ സെഷൻസ് കോടതി പത്ത് വർഷം തടവിന് ശിക്ഷിച്ചത്. പിഴ യുവതിക്ക് നൽകാനും കോടതി ഉത്തരവിട്ടു.

2011 ഏപ്രിലിലാണ് കേസിനാസ്‌പദമായ സംഭവം. ആലപ്പുഴ സ്വദേശിനിയുടെ വീട്ടിൽ അതിക്രമിച്ച് കയറിയ പ്രതി പീഡിപ്പിക്കാൻ ശ്രമിക്കുകയായിരുന്നു. പീഡനശ്രമം തടഞ്ഞ യുവതിയുടെ മാറിടം ഇയാൾ കടിച്ചു മുറിച്ചു. അക്രമത്തിൽ യുവതിയുടെ തലയ്ക്കും പരിക്കേറ്റിരുന്നു. നിരവധി കേസുകളിൽ പ്രതിയാണ് നജ്മൽ.