മലപ്പുറം: ഹർത്താൽ ബി.ജെ.പിയെ ശക്തിപ്പെടുത്താനേ സഹായിക്കൂ എന്ന് മുസ്ലിം ലീഗ് അഖിലേന്ത്യാ ജനറൽ സെക്രട്ടറി പി.കെ.കുഞ്ഞാലിക്കുട്ടി എം.പി പറഞ്ഞു. ഹർത്താൽ നടത്തേണ്ടപ്പോൾ കേരളം ഒറ്റക്കെട്ടായി നടത്തും. ജനങ്ങൾ ഹർത്താലിനെ അനുകൂലിക്കുന്നില്ല. കേരളം ഒന്നാകെ പൗരത്വഭേദഗതി നിയമത്തെ എതിർക്കുന്ന ഘട്ടത്തിൽ ഹർത്താലിന്റെ ആവശ്യമില്ല. ഭരണഘടനയുടെ പ്രശ്നമാണെന്നതിനാൽ വിഭാഗീയതയോ രാഷ്ട്രീയ മുതലെടുപ്പോ ആരും ആഗ്രഹിക്കുന്നില്ല. യു.ഡി.എഫും എൽ.ഡി.എഫും യോജിച്ച് പ്രവർത്തിക്കുന്നത് ഇതിന്റെ തെളിവാണ്. മതേരത ചട്ടക്കൂട് തകരുന്നത് രാജ്യത്തിന്റെ നിലനിൽപ്പിന്റെ പ്രശ്നമാണെന്ന തിരിച്ചറിവ് കേരളത്തിനുണ്ട്. ഇതില്ലാത്ത ചെറിയ ന്യൂനപക്ഷത്തെ ശക്തിപ്പെടുത്തുന്ന നടപടി ആരുടെ ഭാഗത്ത് നിന്നുമുണ്ടാവാൻ പാടില്ല. ഇതിനാലാണ് യു.ഡി.എഫും ലീഗും ഹർത്താലിനെ പിന്തുണക്കാത്തതെന്നും അദ്ദേഹം പറ‌‍ഞ്ഞു.