പാലക്കാട്: അഭിനയവും സംവിധാനവും പരിചയപ്പെടുന്നതിന്റെ ഭാഗമായി പുതുശ്ശേരി പഞ്ചായത്തിലെ കൗമാരക്കാരായ പെൺകുട്ടികൾ ഹ്രസ്വചിത്രം നിർമ്മിക്കുന്നു. ഐ.സി.ഡി.എസിന്റെ നേതൃത്വത്തിൽ ക്രിസ്മസ് അവധിക്കാലത്ത് നടത്തിയ 'തൂവൽപക്ഷികൾ' ക്യാമ്പിലാണ് 'അറിയാതെ' എന്ന പേരിൽ ഹ്രസ്വചിത്ര നിർമാണം ആരംഭിച്ചത്.

പെൺകുട്ടികളുടെ സമഗ്ര വികസനത്തിനായുള്ള 2019-20 പദ്ധതിയിൽ ഉൾപ്പെടുത്തി പഞ്ചായത്താണ് 60000 രൂപ ചെലവഴിച്ച് ചിത്രം നിർമ്മിക്കുന്നത്. 12 മുതൽ 18 വയസുവരെ പ്രായമുള്ള 28 പെൺകുട്ടികളാണ് 10 മിനുട്ട് ദൈർഘ്യമുള്ള ചിത്രത്തിന്റെ ഭാഗമാകുന്നത്. അഭിനയവും തിരക്കഥയും സംവിധാനവും പെൺകുട്ടികൾ തന്നെ.എഡിറ്റിംഗിലും ചായാഗ്രാഹണത്തിലും മുതിർന്നവരുടെ സഹായമുണ്ട്. കുട്ടികളിലെ കഴിവുകൾ പ്രയോജനപ്പെടുത്തുന്നതിനും പുതിയൊരു മേഖല അവർക്ക് പരിചയപ്പെടുത്തുന്നതിനുമാണ് ഇത്തരം പരിപാടികൾ ആവിഷ്‌കരിക്കുന്നതെന്ന് പഞ്ചായത്ത് പ്രസിഡന്റ് കെ. ഉണ്ണികൃഷ്ണൻ പറഞ്ഞു.

ചിത്രീകരണത്തിന് മുന്നോടിയായി രണ്ടുദിവസം അഭിനയകളരിയും സംവിധാന പരിശീലനവും നടന്നിരുന്നു. അഭിനയം പരിശീലിപ്പിക്കാൻ മിമിക്രി കലാകാരനായ റിനീഷ് കണ്ണൂർ, സംവിധാനം പരിചയപ്പെടുത്താൻ സൂര്യ സജിയും ക്യാമ്പിലെത്തി. കഞ്ചിക്കോട് ഗവ. ഹയർ സെക്കൻഡറി സ്‌കൂളിലും ഈ പരിസരത്തെ ഒരു വീട്ടിലുമായാണ് ചിത്രീകരണം നടന്നത്. മൊബൈൽ ഫോണിന്റെ അമിത ഉപയോഗം മൂലം വായനയിൽ നിന്നും സർഗാത്മക പ്രവർത്തനങ്ങളിൽ നിന്നും വഴിമാറി നടക്കുന്ന പുതുതലമുറയെയാണ് ചിത്രത്തിൽ ചർച്ച ചെയ്യുന്നത്. ഐ.സി.ഡി.എസ് സൂപ്പർവൈസറായ ലിമി ലാലിന്റേതാണ് ആശയം. പുതുവർഷത്തിൽ പുതുശ്ശേരി ഗ്രാമപഞ്ചായത്ത് കമ്മ്യൂണിറ്റി ഹാളിൽ ചിത്രം പൊതുജനങ്ങൾക്കായി പ്രദർശിപ്പിക്കും.

ഫോട്ടോ (1): ഐ.സി.ഡി.എസിന്റെ നേതൃത്വത്തിൽ പുതുശ്ശേരി ഗ്രാമപഞ്ചായത്തിൽ നടക്കുന്ന ഹ്രസ്വ ചിത്രത്തിന്റെ അണിയറസംഘം.