പത്തനംതിട്ട- ഇലന്തൂർ ഗവ.ആർട്സ് ആൻഡ് സയൻസ് കോളേജിന് സ്വന്തമായി കെട്ടിടം നിർമ്മിക്കാനുള്ള നിർദ്ദിഷ്ട സ്ഥലം ജില്ലാ കളക്ടർ പി.ബി നൂഹ് സന്ദർശിച്ചു. ഖാദി ബോർഡിന്റെ ഉടമസ്ഥതയിലുണ്ടായിരുന്ന മൂന്നേക്കർ സ്ഥലവും സ്വകാര്യ വ്യക്തികളിൽ നിന്ന് ഏറ്റെടുക്കേണ്ട രണ്ടേക്കർ പന്ത്രണ്ട് സെന്റ് സ്ഥലവുമാണ്സന്ദർശിച്ചത്.
ഇലന്തൂർ പൂമലക്കുന്നിൽ അഞ്ചേക്കർ പന്ത്രണ്ട് സെന്റ് സ്ഥലമാണ് കോളേജിനായി ലഭിക്കുക. ഖാദി ബോർഡിന്റെ മൂന്നേക്കർ ഭൂമി റവന്യു വകുപ്പ് ഉന്നത വിദ്യാഭ്യാസ ഡയറക്ടർക്ക് കൈമാറുന്നതോടെ സ്ഥലം കോളേജിന് ലഭ്യമാകും. ശേഷിക്കുന്ന രണ്ടേക്കർ പന്ത്രണ്ട് സെന്റ് ഭൂമിയുടെ ഏറ്റെടുക്കൽ സംബന്ധിച്ചുള്ള നടപടികൾ പുരോഗമിക്കുകയാണന്ന് ജില്ലാ കളക്ടർ അറിയിച്ചു.
കിഫ്ബിയുടെ ഫണ്ട് ഉപയോഗിച്ച് കിറ്റ്‌കോയുടെ നേതൃത്വത്തിലാണ് കോളേജ് കെട്ടിടത്തിന്റെ നിർമ്മാണ പ്രവർത്തനങ്ങൾ നടക്കുക. 2014 ൽ ആരംഭിച്ച ഗവ.കോളേജ് നിലവിൽ ഇലന്തൂർ ഗവ.ഹൈസ്​കൂൾ കെട്ടിടത്തിലാണ് പ്രവർത്തിക്കുന്നത്.
എ.ഡി.എം: അലക്സ് പി. തോമസ്, ഡെപ്യൂട്ടി കളക്ടർ എസ്.ശിവപ്രസാദ്, കോഴഞ്ചേരി തഹസിൽദാർ ബി.ജ്യോതി, കോഴഞ്ചേരി അഡീഷണൽ തഹസിൽദാർ കെ.ഓമനക്കുട്ടൻ, റവന്യൂ വിഭാഗം ജൂനിയർ സൂപ്രണ്ട് പി.ജെ എബ്രഹാം, ഇലന്തൂർ ഗവൺമെന്റ് കോളേജ് ഇംഗ്ലീഷ് വിഭാഗം മേധാവി ഡോ.ജിജു വർഗീസ് ജേക്കബ്, പഞ്ചായത്ത് മെമ്പർ കെ.പി മുകുന്തൻ എന്നിവർ കളക്ടർക്കൊപ്പം ഉണ്ടായിരുന്നു.