കോഴഞ്ചേരി: ആറന്മുള ഖാദിയുടെ പുനർജീവന പദ്ധതികളുടെ
ഭാഗമായി ഖാദി വിപണന മേളയ്ക്ക് തുടക്കമായി. വീണാ ജോർജ്ജ് എം.എൽ.എ
ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് ലതാ വിക്രമൻ
അദ്ധ്യക്ഷയായിരുന്നു. കൊച്ചിൻ ഷിപ്പിയാർഡിന്റെ സഹായത്തോടെ നവീകരിച്ച ഖാദി ഭവന്റെ ഉദ്ഘാടനം ഷിപ്പിയാർഡ് ഡയറക്ടർ ബി. രാധാകൃഷ്ണമേനോനും ആദ്യവില്പന ഇലന്തൂർ ബ്ലോക്ക് പഞ്ചായത്ത് പ്രസിഡന്റ് ജെറി മാത്യു സാമും നിർവഹിച്ചു. ഖാദി ബോർഡ് പ്രൊജക്ട് ഓഫീസർ ടി.കെ. വിജയമ്മ മുഖ്യപ്രഭാഷണം നടത്തി. ഖാദി ബോർഡ് അസി.ഡയറക്ടർ പി.വി സുരേഷ് കുമാർ,ബ്ലോക്ക് പഞ്ചായത്ത് അംഗം വത്സമ്മ മാത്യു, .ജി.സദാശിവൻ നായർ, ആർ.ഗീതാകൃഷ്ണൻ, പ്രഭാ രവീന്ദ്രൻ, പോൾ രാജ് എന്നിവർ പ്രസംഗിച്ചു. സ്വാതന്ത്ര്യസമര പ്രവർത്തക വനജാക്ഷിയമ്മയെ ആദരിച്ചു.
ജനുവരി 15 വരെ ആറന്മള പരമൂട്ടിൽപടിയിലുള്ള ഖാദി ഭവനിലാണ് ഫെസ്റ്റ് നടക്കുന്നത്. സർക്കാർ അംഗീകൃത റിബേറ്റ് ലഭിക്കും.
കോട്ടൺ ഖാദി, മസ്ലിൻഖാദി, ഖാദി സിൽക്ക്, റെഡിമെയ്ഡ് ഷർട്ടുകൾ, കുർത്തകൾ, ചുരിദാർ ടോപ്പുകൾ, ഖാദി മുണ്ടുകൾ, തോർത്തുകൾ, തേൻ, തേൻ ഉൽപ്പന്നങ്ങൾ, ആയുർവ്വേദ ഉത്പ്പന്നങ്ങൾ, ജൂട്ട് സാരികൾ, കരകൗശല
വസ്തുക്കൾ, ഗ്രാമീണ ഭക്ഷ്യ ഉൽപ്പന്നങ്ങൾ, ജൈവരീതിയിൽ
ഉൽപ്പാദിപ്പിച്ച ആറന്മുള അരി എന്നിവ ഫെസ്റ്റിൽ ലഭിക്കും.