തിരുവല്ല: രണ്ടു പകലിരവുകളെ ധന്യമാക്കി തിരുമൂലപുരത്ത് `ഗുരു അരങ്ങ്` ശ്രീനാരായണ കലോത്സവത്തിന് തിരിതെളിഞ്ഞു. എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന്റെ അദ്ധ്യക്ഷയിൽ നടന്ന സമ്മേളനത്തിൽ കൃഷിമന്ത്രി വി.എസ്.സുനിൽകുമാർ കലാമേള ഉദ്ഘാടനം ചെയ്തു. യൂണിയൻ ചെയർമാൻ ബിജു ഇരവിപേരൂർ റിപ്പോർട്ട് അവതരിപ്പിച്ചു. യൂണിയൻ കൺവീനർ അനിൽ എസ്.ഉഴത്തിൽ സ്വാഗതം ആശംസിച്ചു. കോടുകുളഞ്ഞി വിശ്വധർമ്മമഠം മഠാധിപതി സ്വാമി ശിവബോധാനന്ദ അനുഗ്രഹപ്രഭാഷണം നടത്തി. യോഗം അസി.സെക്രട്ടറി പി.എസ്.വിജയൻ സന്ദേശം നൽകി. യോഗം ഇൻസ്‌പെക്റ്റിംഗ് ഓഫീസർ രവീന്ദ്രൻ എഴുമറ്റൂർ മുഖ്യപ്രഭാഷണം നടത്തി. പിന്നാക്ക വികസന കോർപ്പറേഷൻ ഡയറക്ടർ എ.പി.ജയൻ, കോഴഞ്ചേരി യൂണിയൻ പ്രസിഡന്റ് മോഹൻബാബു, സെക്രട്ടറി ദിവാകരൻ, നേതാക്കളായ ദയകുമാർ, രാഗേഷ് കോഴഞ്ചേരി, പ്രൊഫ.സതീഷ് കൊച്ചുപറമ്പിൽ, ഡോ.കെ.ജി.സുരേഷ്, സുധാഭായി, ഗിരീഷ് മല്ലപ്പള്ളി, വി.ജി. വിശ്വനാഥൻ വേട്ടവക്കോട്ട്, അനിൽചക്രപാണി, ഷാനിമോൾ കെ.സോമൻ, സന്തോഷ് ഐക്കരപ്പറമ്പിൽ എന്നിവർ പ്രസംഗിച്ചു. എസ്.എൻ.ഡി.പി യോഗം തിരുവല്ല യൂണിയന്റെ ആഭിമുഖ്യത്തിലാണ് 48 ശാഖകളിലെ കലാപ്രതിഭകൾ മാറ്റുരയ്ക്കുന്ന കലാമേള സംഘടിപ്പിച്ചിട്ടുള്ളത്. നിരവധി സ്‌കൂൾ കലോത്സവങ്ങൾക്ക് വേദിയായിട്ടുള്ള തിരുമൂലപുരത്ത് സംഘടിപ്പിക്കുന്ന ശ്രീനാരായണ കലോത്സവം നാട്ടുകാർക്കും വേറിട്ട അനുഭവമായി. തിരുമൂലപുരം എസ്.എൻ.വി.എസ് ഹൈസ്‌കൂളിലെ മൂന്നു വേദികളിലും നിറഞ്ഞ സദസ്സിലാണ് മത്സരങ്ങൾ അരങ്ങേറുന്നത്. യൂണിയനിലെ വിവിധ ശാഖകളിൽ നിന്നെത്തിയവരും നാട്ടുകാരും കുട്ടികളുമെല്ലാം സദസ്സിനെ ധന്യമാക്കുന്നു. എൽ.പി, യു.പി, ഹൈസ്‌കൂൾ, ബിരുദതലങ്ങളിലായി നടക്കുന്ന മത്സരങ്ങളിൽ മുന്നൂറോളം പേർ പങ്കെടുക്കുന്നുണ്ട്. ശാഖാതലത്തിലെ ശ്രീനാരായണ കലോത്സവത്തിൽ വിജയികളായി മേഖലാതലത്തിലും മത്സരിച്ചു വിജയം നേടിയവരാണ് യൂണിയൻ തലത്തിലെ കലോത്സവത്തിൽ മാറ്റുരയ്ക്കുന്നത്. സ്‌കൂൾ മൈതാനത്തെ പ്രധാന വേദിയിലാണ് കേരളനടനം, ഭരതനാട്യം എന്നിവ അരങ്ങേറിയത്. തിരുവാതിര, കുച്ചിപ്പുടി, എന്നിവ ഓഡിറ്റോറിയത്തിലെ രണ്ടാം വേദിയിലും മിമിക്രി, ചെണ്ടമേളം എന്നിവ മൂന്നാം വേദിയിലും അരങ്ങേറി. കലോത്സവത്തിന് എത്തുന്നവർക്കെല്ലാം ഭക്ഷണവും ഒരുക്കിയിട്ടുണ്ട്.
സമാപനം ഇന്ന്
ശ്രീനാരായണ കലോത്സവത്തിന്റെ സമാപനം ഇന്ന് നടക്കും. രാവിലെ 8.30 മുതൽ രജിസ്‌ട്രേഷനും 9 മുതൽ കലാമത്സരങ്ങളും ആരംഭിക്കും. ഗുരുദേവകൃതികളുടെ ആലാപനം, പദ്യപാരായണം, ഒപ്പന, പ്രസംഗം, മോണോ ആക്ട്, മോഹിനിയാട്ടം, സംഘനൃത്തം, ഗുരുദേവ ക്വിസ്, കവിതാരചന, ഉപന്യാസം, നാടൻപാട്ട്, പ്രച്ഛന്നവേഷം എന്നീ മത്സരങ്ങൾ ഇന്ന് നടക്കും. വൈകിട്ട് മൂന്നിന് സമാപന സമ്മേളനം മാത്യു.ടി.തോമസ് എം.എൽ.എ ഉദ്ഘാടനം ചെയ്യും. ചലച്ചിത്ര സംവിധായകൻ ബ്ളസി സമ്മാനദാനം നടത്തും. കുറിച്ചി അദ്വൈത വിദ്യാശ്രമം സെക്രട്ടറി സ്വാമി ധർമ്മചൈതന്യ അനുഗ്രഹ പ്രഭാഷണം നടത്തും. ശ്രീലേഖ രഘുനാഥ്‌, പ്രസന്നകുമാർ, ദീപു ശാന്തി, സുജിത്ത് ശാന്തി, പ്രസാദ് മുല്ലശേരി എന്നിവർ പ്രസംഗിക്കും.
ചികിത്സാസഹായ വിതരണവും ആദരിക്കലും
ഇന്ന് 10.30ന് ചികിത്സാസഹായ വിതരണവും ആദരിക്കൽ സമ്മേളനവും എസ്.എൻ.ഡി.പി യോഗം വൈസ് പ്രസിഡന്റ് തുഷാർ വെള്ളാപ്പള്ളി ഉദ്ഘാടനം ചെയ്യും. യൂണിയൻ ചെയർമാൻ ബിജു ഇരവിപേരൂർ അദ്ധ്യക്ഷത വഹിക്കും. യൂണിയൻ കൺവീനർ അനിൽ എസ്.ഉഴത്തിൽ സ്വാഗതം ആശംസിക്കും. ആലുവ അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദ അനുഗ്രഹ പ്രഭാഷണം നടത്തും. യോഗം അസി.സെക്രട്ടറി പി.എസ്.വിജയൻ, ഇൻസ്‌പെക്റ്റിംഗ് ഓഫീസർ രവീന്ദ്രൻ എഴുമറ്റൂർ,നേതാക്കളായ അശോകൻ കുളനട,കെ.ജി.ബിജു, സുമേഷ് ആഞ്ഞിലിത്താനം, രാജേഷ് ശശിധരൻ,എം.മഹേഷ്, ശരത് ഷാജി, പി.എൻ. മണിക്കുട്ടൻ എന്നിവർ പ്രസംഗിക്കും.