കൊല്ലം: വാഹനമോടിക്കുന്നതിനിടയിൽ ഡ്രൈവർ ഉറങ്ങിയാൽ യാത്രക്കാരുടെ ജീവന് പോലും ഹാനിയുണ്ടാകാം. ഇത്തരത്തിൽ ദീർഘദൂര യാത്രയ്ക്കിടെ ഡ്രൈവർ ഉറങ്ങിപ്പോയത് മൂലമുണ്ടായ അപകടങ്ങൾ നിരവധിയാണ്. ഈ പ്രശ്നത്തിന് പരിഹാരവുമായി എത്തിയിരിക്കുകയാണ് കൊല്ലം ഉളിയക്കോവിൽ സെന്റ് മേരീസ് പബ്ളിക് സ്കൂളിലെ കുട്ടി ശാസ്ത്രജ്ഞർ.

എട്ടാം ക്ളാസ് വിദ്യാർത്ഥികളായ സാമുവേൽ വിക്ടർ, കാർത്തിക് എം. രാജ് എന്നിവരാണ് ഈ കണ്ടുപിടിത്തത്തിന് പിന്നിലെ ശാസ്ത്ര പ്രതിഭകൾ. യാത്രയ്ക്കിടെ ഡ്രൈവർ ഉറങ്ങിപ്പോയാൽ വാഹനത്തിൽ ഘടിപ്പിച്ചിരിക്കുന്ന ഉപകരണത്തിൽ നിന്ന് അലാറാം മുഴങ്ങുകുയം മുന്നിലും പിന്നിലുമായുള്ള വാഹനങ്ങൾക്ക് മുന്നറിയിപ്പും നൽകും. സംസ്ഥാന സി.ബി.എസ്.ഇ ശാസ്ത്രമേളയിലാണ് ഇവർ തങ്ങളുടെ ഉപകരണം പ്രദർശനത്തിനെത്തിച്ചത്. മത്സരത്തിൽ ഉളിയക്കോവിൽ സെന്റ്​ മേരീസ്​ ഇംഗ്ലീഷ്​ മീഡിയം പബിക്​ സ്​കൂൾ ഒന്നാംസ്ഥാനം കരസ്ഥമാക്കി. ദേശീയതല ശാസ്ത്രോത്സവത്തിലേക്കും ഇവർ ​തിരഞ്ഞെടുക്കപ്പെട്ടു​.

ജനുവരിയിൽ ന്യൂഡൽഹിയിൽ നടക്കുന്ന ദേശീയ മത്സരത്തിൽ ജില്ലയിൽ നിന്ന് പങ്കെടുക്കാൻ അവസരം ലഭിച്ച ഏക സി.ബി.എസ്​.ഇ സ്​കൂളാണ് ഉളിയക്കോവിൽ സെന്റ് മേരീസ് പബ്ളിക് സ്കൂൾ. ​സംസ്ഥാന ശാസ്ത്രമേളയിൽ റോബോട്ടുകളെ ഉപയോഗിച്ച് മാലിന്യം സംഭരിക്കാനും വേർതിരിക്കാനുമുള്ള ഉപകരണവും സ്കൂളിലെ കുട്ടികൾ പ്രദർശിപ്പിച്ചിരുന്നു.