കൊട്ടാരക്കര: ജീവിത സായന്തനത്തിൽ ഒറ്റപ്പെട്ടുപോയവർക്ക് തണലൊരുക്കാൻ 'സായന്തനം' വൃദ്ധസദനമൊരുങ്ങുന്നു. ജില്ലാ പഞ്ചായത്തിന്റെ നേതൃത്വത്തിൽ തുടങ്ങുന്ന സായന്തനത്തിന്റെ കെട്ടിട നിർമ്മാണ പ്രവർത്തനങ്ങൾക്ക് പുത്തൂർ പഴയചിറയിൽ തുടക്കമിട്ടു.

ഫെബ്രുവരി 26ന് മന്ത്രി കടന്നപ്പള്ളി രാമചന്ദ്രൻ ശിലാസ്ഥാപനം നടത്തിയിരുന്നെങ്കിലും നിർമ്മാണം തുടങ്ങിയത് ഇപ്പോഴാണ്. ആറ് മാസത്തിനുള്ളിൽ നിർമ്മാണ ജോലികൾ പൂർത്തിയാക്കി ഉദ്ഘാടനം നടത്താമെന്നാണ് പ്രതീക്ഷ. ജില്ലയുടെ വിവിധ ഭാഗങ്ങളിലുള്ള ഒറ്റപ്പെടൽ അനുഭവിക്കുന്ന വയോജനങ്ങൾക്ക് ഇവിടം പ്രയോജനപ്പെടും.

 1.5 കോടി രൂപയുടെ പദ്ധതി

ജില്ലാ പഞ്ചായത്ത് അനുവദിച്ച ഒന്നര കോടി രൂപ ഉപയോഗിച്ചാണ് പവിത്രേശ്വരം ഗ്രാമപഞ്ചായത്തിൽപ്പെടുന്ന പുത്തൂർ‌ പഴയചിറയിൽ വൃദ്ധസദനം നിർമ്മിക്കുന്നത്. പട്ടികജാതി വികസന വകുപ്പിന്റെ കീഴിലുള്ള പ്രീമെട്രിക് ഹോസ്റ്റലിനോട് ചേർന്നാണ് കെട്ടിടമൊരുക്കുന്നത്.

കെട്ടിടത്തിനായി ഗ്രാമപഞ്ചായത്താണ് 60 സെന്റ് ഭൂമി വിട്ടുനൽകിയത്. കാട് മൂടിക്കിടന്നിരുന്ന ഇവിടം വൃത്തിയാക്കി നിരപ്പ് വരുത്തിയിട്ടാണ് പൈലിംഗ് ജോലികൾ ആരംഭിച്ചിട്ടുള്ളത്. ഹൗസിംഗ് ബോർഡിനാണ് നിർമ്മാണച്ചുമതല. 4500 ചതുരശ്ര അടി വിസ്തീർണമുള്ള രണ്ട് നില കെട്ടിടമാണ് നിർമ്മിക്കുന്നത്. 9 മാസമാണ് നിർമ്മാണത്തിനുള്ള കരാർ കാലാവധി.

 സായന്തനം ഹൃദ്യമാകും (എസ്. പുഷ്പാനന്ദൻ, ജില്ലാ പഞ്ചായത്തംഗം)

വീട്ടിലും സമൂഹത്തിലും ഒറ്റപ്പെട്ടുപോയ വയോജനങ്ങൾക്ക് ആശ്വാസമാകുന്നതാണ് സായന്തനം പദ്ധതി. പ്രായമായവരെ സംരക്ഷിക്കാനും ഭക്ഷണവും വസ്ത്രവും ചികിത്സയും മറ്റ് സൗകര്യങ്ങളും നൽകാനുമാണ് ലക്ഷ്യമിടുന്നത്. അവർക്ക് മാനസിക ഉല്ലാസത്തിന് ഉതകുന്ന പരിപാടികളും അന്തരീക്ഷവും ഒരുക്കി ഇവിടമൊരു ഹൃദ്യഅനുഭവമാക്കും. തുടർന്ന് കൂടുതൽ സർക്കാർ സഹായം ലഭ്യമാക്കി അത്യാധുനിക സംവിധാനങ്ങളുമൊരുക്കും. ജീവനക്കാരെ നിയമിക്കുക, കുടിവെള്ള സംവിധാനങ്ങൾ, ടോയ്ലറ്റ് കോംപ്ളക്സ്, ഫർണിച്ചർ, മാലിന്യ സംസ്കരണ പ്ളാന്റ്, വായനശാല തുടങ്ങിയ മറ്റ് സൗകര്യങ്ങളും ഒരുക്കേണ്ടതുണ്ട്.

 60 സെന്റ് ഭൂമിയിൽ

 രണ്ട് നില കെട്ടിടം

 4500 ചതുരശ്ര അടി