കൊല്ലം: മുൻ മുനിസിപ്പൽ ചെയർമാനും, സംസ്ഥാന സ്‌പോർട്സ് കൗൺസിൽ വൈസ് പ്രസിഡന്റുമായിരുന്ന കെ. തങ്കപ്പന്റെ സ്മരണയ്ക്കായി കെ. തങ്കപ്പൻ ഫൗണ്ടേഷൻ ഏർപ്പെടുത്തിയ കായിക പുരസ്‌ക്കാരത്തിന് ആൻസി സോജനും എമിൽ ബെന്നിയും അർഹരായി.
2019ലെ സംസ്ഥാനത്തെ മികച്ച അത്‌ലറ്റായി സംസ്ഥാന അത്‌ലറ്റിക് അസോസിയേഷൻ ആൻസി സോജനെയും, മികച്ച ഫുട്‌ബോളറായി കേരള ഫുട്‌ബോൾ അസോസിയേഷൻ എമിൽ ബെന്നിയെയും തിരഞ്ഞെടുത്ത് നൽകുകയായിരുന്നു.
ഡിസംബർ 15ന് വൈകിട്ട് 5ന് ക്വയിലോൺ അത്‌ലറ്റിക് ഹാളിൽ ചേരുന്ന കെ. തങ്കപ്പൻ അനുസ്മരണ സമ്മേളനത്തിൽ വച്ച് 25,000 രുപ വീതമുള്ള ക്യാഷ് അവാർഡും, പുരസ്‌ക്കാര ങ്ങളും എൻ. കെ. പ്രേമചന്ദ്രൻ എം.പി സമ്മാനിക്കും.
തൃശൂർ നാട്ടിക സ്വദേശിയായ ആൻസി സോജൻ (18) 2018 ലെ ദേശീയ യൂത്ത് അത്‌ലറ്റിക് ചാമ്പൻഷിപ്പിൽ 100 മീററർ ഹർഡിൽസിലും മെഡ്‌ലേ റിലേയിലും ദേശീയ റെക്കാഡോടെ സ്വർണം കരസ്ഥമാക്കിയിരുന്നു. 2019 ലെ 63 മത് കേരള സ്റ്റേറ്റ് സ്കൂൾ അത്‌ലറ്റിക് ചാമ്പൻഷിപ്പിൽ 100 മീറ്റർ 200 മീറ്റർ ലോംഗ് ജെമ്പ് ഇനങ്ങളിൽ റിക്കാർഡോടെ സ്വർണമെഡൽ കരസ്ഥമാക്കുകയും ചെയ്തു.
വയനാട് മേപ്പാടി സ്വദേശിയായ എമിൽ ബെന്നി (19) 2016 ഖേലോ ഇന്ത്യ ടീമംഗമായിരുന്നു. 2019 സന്തോഷ് ട്രോഫി ഫുട്‌ബോൾ ടീമംഗമായി ഇപ്പോൾ കളിക്കുന്നു.